4 aña di prison pa mama cu a abusa di su dos yiunan menor di edad
ORANJESTAD – Awe mainta Hues di Corte di Husticia a dicta sentencia den e caso penal cu Ministerio Publico a cuminsa contra e dama R., kende Fiscal ta haya culpable di a abusa di su dos yiunan menor di edad.
4 AÑA DI PRISON EXIGI
Algun siman pasa tratamento di e caso a tuma lugar caminda Fiscal a bisa cu e forma con e muchanan a describi kico e mama tabata haci nan y nan mester a haci cu otro, esaki no por wordo considera abuso. El a bisa cu mester tin un forma di penetracion pa considera esaki como abuso.
A ABUSA DI SU YIUNAN
Fiscal a sigui bisa cu den e caso aki por papia di actonan inmoral y e forma con esakinan a sosode, por considera esaki como abuso. E hecho cu e muchanan, bou presion di e mama, nan mester haci actonan inmoral, por considera esaki mescos cu ta penetracion. Fiscal ta haya cu R. ta culpable. Pa cu e castigo, Fiscal a bisa cu hechonan asina por afecta e muchanan pa hopi tempo. Esaki por manifesta ora e muchanan a bira adulto. Fiscal a exigi 4 aña di prison pa R.
CASTIGO DI 4 AÑA DI PRISON
Awe mainta Hues a bisa cu, mescos cu Fiscal, e no ta haya proba cu tabatin penetra sexual cu e muchanan. Hues si ta haya proba e acusacion subsidiario, esta cu R. entre 2012 y 2017 a haci actonan inmoral cu su dos yiunan.
Hues a bisa cu e ta haya e declaracion di e muchanan ta consistente. E ta confia e declaracion di e muchanan. E ta haya cu tin dos declaracion cu ta sirbi pa pruebanan di sosten. E muchanan a mira kico nan mama a haci cu nan. Hues a bisa cu e mucha homber tabata pupu y pishi den su carson na school. Esaki ta su reaccion ora e pensa cu e tin cu bay cas pa haci cosnan inmoral cu su ruman muher y su mama.
Hues a remarca cu un mama cu ta laga su yiunan chikito haci actonan inmoral cu otro y cun’e, ta un asunto hopi serio. Esaki por afecta e muchanan den futuro.
Hues a bisa cu e ta haya e exigencia di Fiscal na su lugar y ta confirma esaki. Hues a condena R. na 4 aña di prison, kitando e tempo cu e ta sera den KIA
