Calabas/Kudawecha – Nos tur cu ta biba den Caribe sa cu despues c’un tormenta of horcan pasa ainda cos no a caba, si no cu hopi biaha mester tene cuenta cu e rabo cu ta bin su tras y cu por trece masha hopi awa mes. Pero, den raro ocasion, e “pui” cu ta bin dilanti dje storm por dal bo un pui prome cu e storm mes yega, y e puimento ey por laga hopi dolor atras. Diasabra ultimo, mientras ya tur hende tabata na altura cu e tormenta tropical ta na caminda, e pui dje tormenta a pasa dal TEAM SNOR duro den e unico y mundialmente famoso Domino Square Garden aya na Calabas. Awa a yobe bou dak sin misericordia ora cu e feroz ekipo nobo di BOU DAK KILLER DOMINO TEAM, bou guia di nada menos cu Gibi“The Coordinator”, a pasa manera pui di horcan lastra Team SNOR bay cu ne y dun’e un shelter bou palo!
Hopi fanatico di domino tabata spera e revancha entre Team SNOR y e antes Team BOU PALO, kende ultimo a “upgrade” nan real estate di bou palo pa bou dak, y a cambia nan nomber pa BOU PALO KILLER DOMINO TEAM. Biaha pasa e bataya tabata sumamente preta y ta te na ultimo ora Gibi y su gang a logra pasa Snor Perez voorbij y caba cuenta cu score di 21 – 19. Pero e biaha aki? Ayayay shonnan, ta manera un tsunami a pasa laba tur ilusion y glamour di domino for dje ekipo di Snor.
Ta manera un glas di awa friu a dal den cara di Snor ora cu den un frega di wowo halftime ta bati y BOU DAK ta ganando cu score increibel di 11-5! Hopi a grawata cabes y bisa “wel, por pasa, ban bek pa nan den di dos rond”. Sinembargo, parce cu ta e ora e tormenta di Gibi a cuminsa bay di code cora pa code preto! Sin sikiera blink wowo, e sicarionan di Gibi a ranca sali, y prome cu Snor por a caba di seca e mosterd dje kroket for di su bigoti, ya caba el a hay’e ta staar den un abismo scur y sin speransa ora Gibi su team a yega 20 y nan ta pega ainda na 10! Sin perdon Gibi ta claba e ultimo clabo den e caha y manda Team SNOR fondo cu score increibel di 21-10!
Shonnan, caranan babuca so a keda wak rond ta cua tormenta e team nobo aki di Gibi ta, cu a pasa ranca un ekipo conoci asina manera Team SNOR hib’e lag’e pega bou dje palo di kwihi otro banda di Highway 69 aya na Calabas! Keda pendiente shonnan, pasobra ainda e rabo dje horcan mes no a yega ainda!
