PARIBA LEGENDS A DUNA SERO BLANCO UN “AANWIJZING”!

Calabas/Kudawecha – Diasabra 30 di juli ultimo tabatin un tremendo encuentro di domino entre TEAM PARIBA LEGENDS y TEAM SERO BLANCO den e palacio di domino, e unico y mundialmente famoso Domino Square Garden, aya net n’e grens entre Calabas y Kudawecha. Un anochi c’un ambiente ameno caminda Pariba Legendstabatin e honor di estrena nan uniform nobis nobis. Por a observa tambe cu e conocido “Snor” Perez, lider di e famoso Team Snor cu nan uniform unico den mundo di domino, tambe tabata milita den Pariba Legends. Ariba e pregunta con esaki por, “Snor” a contesta cu e ta e padrino dje team Pariba Legends. Otro misterio resolvirond di e persona enigmatico aki cu tin un “vinger in de pap” den “all things domino”!

Shonnan, e bataya ta cuminsa rond 8’or di anochi y masha lihe por a ripara cu Team Sero Blanco ta lucha cu e poder di pariba! Un pusha, un wanta, pero manera nan ta bisa na Hulandes, Team Sero Blanco “is niet vooruit te branden” y no a dura mucho cu halftime ta bay aden c’un bentaha confortabel pa Pariba Legends!

Manera di custumber, Chef Han ta percura durante halftime p’e snacknan core rond na ordo y por nada! Di dos tempo ta bay aden y Pariba Legends ta sigui subi su “surplus” den e score contra Team Sero Blanco. No tur cos a bay style di “koek en ei” si den Pariba Legends. Apesar di varios “waarschuwing”, un integrante no kier compronde cu bo no por hunga domino y wak basketball ariba celular pareu! Y ata, sapato “Nike Air” blanco a cay p’e na ordo! Pero, a pesar di e inconveniencia chikito aki, e mashin di Pariba Legends ta sigui bati piedra na ordo y, cu score final di 21 – 16, ta logra duna Team Sero Blanco un “aanwijzing”: haci boso huiswerk otro biaha boso enfrenta e legendarionan di pariba si no muy pronto por cambia e nomber den Team Sapato Blanco!

Entre tanto e yega na mesa di redaccion cu tin palabracionnan ta wordo haci entre Team Snor y Pariba Legends pa tene un “final showdown” muy pronto e luna aki mes! Shonnan, keda pendiente p’e sambombaso aki; cada team a caba di gana nan wega y ta sinti cu a yega momento pa midi forsa serio cu otro, sea padrino t’ey of lag’i t’ey! Keda pendiente!

Share:

Leave a Reply

Your email address will not be published.