E helicopter di Guarda Costa mester a drenta 2 biaha den accion diaranson pa yuda personanan cu tabata mester asistencia medico. El prome informe a yega den oranan di mainta na e Centro di Rescate y Coordinacion (RCC) di Guarda Costa. Dos turista cu tabata keiro na St. Christoffelberg cu a cay varios meter den un abismo. E bomberonan, cu a bay na e sitio a informa cu ta imposibel cu e personananpor subi bek

Despues di e informe di e bomberonan aki, Guarda Costa a dirigi nan helicopter na e sitio pa yuda e turistanan aki, un homber y un muher cual ambos a resulta herida door di a cay algun meter den e abismo. Nan a ser rescata y transporta na e base di Guarda Costa na e airport di Hato, unda eynan ambulans tabata spera nan pa transporta nan pa hospital y asina ricibi asistencia medico.

Alrededor di merdia Guarda Costa a ricibi otro informe di evacuacion medico. E biaha aki tabata trata di un turista na Klein Curaçao. E homber a cay y sufri un lesion na su rudia. E informante a indica cu e homber di 55 años mester e asistencia di e helicopter di guardacosta pa e ser traslada pa hospital. Debi na e informe aki, e RCC a dirigi e helicopter na Klein Curaçao pa recoge e victima y trece bek na Hato unda eynan un ambulans tabata spera riba dje pa transporte pa hospital. Guarda Costa ta desea e victimanan un pronto recuperacion.