Diamars prome cu merdia a inicia un candela masha grandi mes na Daltra, mesora cu a drenta informe na Centro di Alarma a avisa polis di esaki. Na yegada di polis cu bombero y a tuma nota cu esaki ta trata di un candela masha grandi y como cu Arugas ta den cercania a mira cu ta peligroso pa personanan cu no ta justifica pa ta na e sitio pa asina pa nan mesun seguridad ser evacua for di e sitio. Polis a haya nan mes ta sera e caminda debi cu e hydrant ta otro banda di caminda net dilanti Ecotec y bomberonan mester a tuma awa for di eynan pa combati e candela. Den e candela tabata tin gasnan y liquidonan quimico cualnan por y sigur ta peligroso pa salud di hende y a bay over na evacua full e area den cercania. Bureau Rampenbestrijding a ser yama pa bini duna asistencia y hasta e crisis team a ser solicita pa reuni unda DVG a emiti tambe un advertencia pa salud di hende.