Dia 3 di oktober ta ultimo dia pa haci peticion pa ‘Areglo pa comerciante chikito’ (KOR) pa aña 2023

ORANJESTAD – Departamento di Impuesto ta recorda tur comerciante chikito cu ta desea di bin na remarca pa e ‘Areglo pa comerciante chikito’ (kleineondernemersregeling of KOR), cu e ultimo dia pa entrega e peticion ta 3 di oktober 2022.
E beneficionan di KOR
E beneficionan di KOR pa e contribuyente-comerciante ta:
– E no tin mester di entrega e declaracion di BBO/BAVP/BAZV tur luna.
– E no tin mester di paga BBO/BAVP/BAZV tur luna.
– E por reserva e extra cen pa otro necesidadnan di e empresa.
– E tin menos trabou administrativo.
Ken por bin na remarca pa KOR?
Pa un comerciante chikito por bin na remarca pa KOR, e mester cumpli cu e siguiente condicionnan:
– E comerciante ta un persona priva y ta biba na Aruba.
– E comerciante tin un empresa propio (eenmanszaak).
– E volumen di benta di e empresa ta Afl. 84.000 of menos pa aña.
Si e comerciante tin mas empresa propio, e ora lo calcula e volumen di benta total di tur empresa hunto.
No ta posibel pa bin na remarca pa KOR, si e actividad di e empresa ta encera explotacion di un of mas propiedad inmobil pa uzo no-residencial. Por ehempel: si e empresario ta huur un propiedad cu ta wordo uza como oficina, e no por haya KOR.
Haci peticion online
Pa haci e peticion di KOR, mester bishita e website www.impuesto.aw. Scoge Digitale formulieren -> kleineondernemersregeling y sigui e instruccionnan. Ta importante pa upload e siguiente documentonan:
– Un scan of potret cla di paspoort, rijbewijs of cedula.
– Copia di e cuenta anual di e empresa di aña 2021.
– Compro.bante di registro na Camara di Comercio.
Departamento di Impuesto lo evalua e peticion di KOR. Solamente e comerciantenan cu ta cumpli cu e condicionnan por haya KOR. Despues di evaluacion, Departamento di Impuesto lo informa e comerciante di e decision via e-mail. Lo manda e e-mail na e e-mailadres cu e comerciante a duna ora cu a haci e peticion di KOR online.

E comerciantenan cu tin KOR pa aña 2022
E comerciantenan cu ya ta beneficia di KOR den aña 2022, no tin mester di haci un peticion pa aña 2023, pero si mester entrega e declaracion anual na december/januari venidero. E ultimo dia pa haci declaracion (online) ta 16 di januari 2023. Di e forma aki Inspector di impuesto por evalua si e volumen di benta di aña 2022 a surpasa e suma di Afl. 84.000 y determina si e comerciante por bin na remarca pa KOR den aña 2023. Si no entrega e declaracion anual, automaticamente e comerciante lo perde su status di KOR pa aña 2023 y mester cuminsa haci declaracion y pago di BBO/BAZV/BAVP den aña 2023.
E comerciantenan cu a perde nan status di KOR pa aña 2022 y ta cumpli cu e condicionnan, por haci peticion pa KOR 2023.
‘Areglo pa comerciante chikito’ ta un facilidad fiscal cu ta beneficia tur comerciante chikito cu ta cumpli cu e condicionnan. Departamento di Impuesto ta recomenda e comerciantenan pa haci uzo di e oportunidad cu ley ta brinda y asina no tin mester di paga BBO/BAZV/BAVP durante aña 2023.
Gerencia di Departamento di Impuesto
13 di september 2022

Share:

Leave a Reply

Your email address will not be published.