ORANJESTAD: Diasabra mainta na Centro Deportivo Simeon Antonio a tuma luga apertura di campeonato Gala Taekwondo Kyorugi & Poomsae organisa pa Tiger Taekwondo Academy.

E competencia a conta cu participacion di atletanan femenino y masculino den diferente  categoria: infantil, cadete, junior, adulto y veterano. Sr. Isnardo Faro a representa a Minister Endy Croes na e ocasion aki. Sr. Faro a hiba palabra durante ceremonia di apertura den nomber di Mandatario di Deporte, unda den su discurso a elogia e dirigentenan di Aruba Taekwondo Bond pa nan excelente trabou cu nan ta haciendo pa nos hobennan di Aruba den e disciplina di taekwondo. Como tambe a felicita Tiger Teakwondo Academy cu recientemente a regresa Aruba cu varios medaya di e prome campeonato Panamericano Infantil y Open G cu a tuma luga na Sogamoso, Colombia. Presidente di Federacion sr. Moises Fernandez tambe a hiba palabra durante e ceremonia di apertura unda e la presenta algun di e plan y proyectonan pa aña 2023. Sigur un federacion cu a demostra disciplina, dedicacion, deseo y determinacion pa por sobresali no solamente nacional pero tambe riba plataforma internacional.