Calabas/Kudawecha – Antes bo tabata haya Ghostbusters, despues a bini Mythbusters, y desde diasabra ultimo 3 di december, awo tin “Legendbusters” tambe! Aki tin un team di domino cu ta cla pa caba cu tur legendario y nan leyenda den domino aki na Aruba. Den un tremendo bataya diasabra ultimo, Team Sams Tsunami a demostra cu nan t’e sheriff nobo in town ora nan a enfrenta e conocido ekipo Pariba Legends di pariba di brug. Wel, shonnan, desde awo en adelante nan por cambia e nomber dje team pa “Pariba Sprookjes”. Golpi duro a cay diasabra n’e palacio di domino net n’e grens entre Calabas y Kudawecha, net paseit dje palo di mal ehempel caminda e perdedonan ta bay pasa nan wayaba.

Despues di un tremendo “peptalk” di capitan di Team Tsunami, nada menos cu e conocido “zware jongen” den domino, Yoyo, a splica extensamente over dje palabra “Tsjalynch”, e ekipo bou patronisahe di Sunny a sali ta haya un sapato blanco! Clean board a cay pa Yoyo y Sunny! Pero, e dos lider veterano aki a dicidi cu nan ta esunnan cu lo wanta un p’e team, pa despues e ekipo porsigui suta na un manera sin pordon! Pa ora halftime a bati, Team Tsunami ta ganando cu score fenomenal di 11 – 4! Mientras un y tur ta disfruta dje pasapalonan gratis di chef Han, e integrantenan di Pariba Legends a haya nan ta grawata cabes (y snor) con pa bay drecha e situacion aki! Den di dos buelta nan a ripara cu ta mescos ta awa nan ta hiba lama. Team Tsunami a sigui bati piedra na ordo y cu score convicente di 21 – 13 nan ta caba cu cualkier idea di legendario cu Pariba Legends por a keda cu ne. Tremendo anochi aya n’e legendario y unico Domino Square Garden na mundo, y shonnan, keda pendiente, pasobra t’awo cos ta cuminsa bira hot p’e temporada di fin di aña!