Diahuebs mainta a drenta informe di cu un cargacion di droga posiblemente tambe personanan illegal a drenta Aruba na Rincon, mesora a dirigi tanto guarda costa como tambe polis na e sitio. Mientras cu polis tabata bayendo na e sitio, guarda costa a señala un Jeep Wrangler recogiendo bultonan y a tuma direccion pa sali banda di Rooi Master. Ta trata aki di e Jeep Wrangler V1472 cu 2 persona den dje. Un rato despues un vehiculo di guarda costa a topa cu e Jeep aki banda di Colegio Cristo Rey y a para e vehiculo, mesora unidadnan policial a yega na e sitio. polis a atende cu nan ta trata di un hoben y un otro persona di mas edad. Mientras polis tabata atende cu e hoben cu tabata na stuur pa detene e homber di poco mas edad tabata na telefon, polis a bay atende cun’e mesora ela kibra e telefon bente abao ocultando asina e evidencia cu ken e tabata papia, polis a detene e tambe. Ambos sospechoso a ser hiba na warda di polis di e unidad di crimen organisa. E vehiculo a ser confisca y e droga confisca. Polis a bay sigui busca den e area di Rincon pa mira si no tin mas bulto of mas lastro di e hendenan. Nos lo sigui informa.