ORANJESTAD: Recientemente, Minister Endy Croes hunto cu colega Minister Rocco Tjon a reuni cu sr. Randolf Lacle y sra. Dyane Wiersma di Arubaanse Voetbol Bond. Durante e reunion a dialoga tocante un proyecto di FIFA, Football for Schools. E idea di e proyecto ta pa introduci futbol femenino na scolnan na Aruba. E meta di e proyecto aki ta: desaroya habilidad di hunga futbol di esnan cu ta practica e deporte aki y alabes contribui na e desaroyo di e habilidadnan importante di bida (life skills), cu ta entre otro: habilidad pa comunica efectivamente, habilidad pa resolve problema y habilidad pa pensa di forma critico y creativo. Football for Schools ta contene tres contribucion principal, cual ta un aplicacion, material y incentivo financiero. E docentenan cu ta participa den e programa aki por haci uzo di un “app” cu ta sirbi como guia pa duna les di futbol. Ademas di esaki, e aplicacion tin un variedad di metodo cu e proposito pa desaroya habilidadnan importante di bida di e hungadonan. E grupo meta ta muchanan di 4 pa 14 aña y ta dividi den diferente categoria. E gastonan di e proyecto aki ta completamente cubri door di FIFA. Minister Endy Croes y Minister Rocco Tjon a bay di acuerdo pa sostene e proyecto deportivo y educativo aki cu ta inicia den aña 2023 y ta traha conhuntamente cu directiva di e centronan di bario di Aruba y CEDE Aruba pa haci e proyecto aki realisabel.