Diahuebs anochi a drenta informe di un incidente cu hende herida banda di Amsterdam Manor, mesora a dirigi tanto polis como ambulans na e sitio. Na yegada di e patruya a bin compronde cu 3 hoben riba scooter pasando pabao di Amsterdam Manor a haya problema den trafico. Na dado momento un di e hobennan pa un motibo of otro a perde control riba su scooter y a dal abao. Polis a pidi mas patruya yega na e sitio pa yuda sera e caminda pa asina ambulans presenta mas facil y liher pa atende cu e hoben herida. E hoben tabata keha di basta dolor na su curpa. Personal di ambulans a trata e hoben na e sitio mes y despues a transporte pa hospital. Su dos amigonan a zorg pa hiba su scooter cas.
