Diabierna ultimo den un actividad di instalacion di miembronan nobo, Aruba Lions Club un biaha mas ta instala dos miembro den nan club di Leonnan pa juda cu trabounan boluntario den comunidad.
Aruba Lions Club den e aña Leonismo aki ta celebrando 75 aña sirbiendo comunidad y asina buskando e interes den mas personanan den comunidad cu ta dispuesto pa hasi trabounan voluntario y juda esnan den nesecidad.
Lion Ivan Croes cu e aña aki ta wordo instala como e gobernador di e districto 35N cual Aruba ta pertenece, ta esun cu a instala e dos miembronan nobo cu ta sr. Kenneth Croes cu ta un hoben comerciante manehando e compania LCR Technical Services cu sigur cu e curazon pa juda den trabounan boluntario.
Un otro persona cu tambe a keda instala ta sr. Ramon Arnhem cu no ta desconoci y ta den e funccion di Alto Comisario di Polis.
Sr. Arnhem tambe ta un persona dynamico cu apenas algun tempo na Aruba a mustra e interes pa integra na un manera servicial den comunidad y den un tempo cortico ja por comunica den nos idioma papiamento y sigur kier contribui den su tempo liber pa por hasi trabounan boluntario pa comunidad.
Den presencia di e presidente actual di Aruba Lions Club, Lion Rubin Ponson cu alavez ta e persona cu a introduci e dos miembronan nobo aki, nan a haya un caluroso bon bini di tur e miembronan presente den e ceremonia cu a tuma lugar na Boulevard Events Aruba.
Aruba Lions Club ta contento di por instala mas personanan cu ta mustra e interes pa por juda den projectonan pa sirbi comunidad manera e dos miembronan nobo aki a mustra den nan promer palabranan e anochi di ceremonia.
Awor Lion Kenneth Croes y tambe Lion Ramon Arnhem ta un bon aporte na e famia di leonnan di Aruba caminda lo bai mustra nan abilidad y un bon curazon pa juda tur esnan cu mester di esaki y tambe pa juda cu e projectonan cu Aruba Lions Club por ta participe.

Directiva di ALC den nomber di tur su miembronan ta jama e dos leonnan aki bon bini, mescos cu pueblo en general mester por aprecia y sostene e clubnan di servicio aki cu sigur ta un gran ayudo pa comunidad.
Aruba Lions Club tin e interes pa sigui introduci mas miembro pa asina engrandece e miembrecia cu mas boluntario pa juda, y ta encourasha tur persona cu e interes aki, pa tuma contacto cu cualkier miembro di Aruba Lions Club pa por haya mas informacion di e prestigioso club aki y asina por cuminsa e proceso pa hasi un solicitud.
Esaki ta mescos pa nan Leo Club cu ta encarga cu hobennan cuminsando for di 12 aña pa hasi projectonan boluntario den comunidad y alavez ta siña organisa reunionnan y traha den grupo pa por logra nan meta.
Afilia na Aruba Lions Club y sirbi bo comunidad.