Calabas/Kudawecha – Aña un caba di habri drechi cu ya batayanan interesante den domino a surgi. E diasabra aki, 4 di december, e bibamento lekker cu tin di rotonde di Tanki Leendert te Nort ta bou menasa dje team duro di pariba di brug, e famoso ekipo di Pariba Legends. E padrino dje team, e conocido matematico den domino Nelson “Snor” Perez, a declara cu nan lo haci todo por todo pa nan rival Team Biba Lekker haya sa con ta sinti ora bida no ta dje dushi ey mas. Esaki t’un wega cu ta bin ta stoba pa basta dia caba, y awo a yega ora pa manda pan bay forno. E conocido y mundialmente famoso Domino Square Garden situa net n’e grens entre Calabas y Kudawecha lo t’e scenario diasabra awor, 4 di december, cuminsando pa 8’or di anochi, dje encuentro excitante y tan spera entre e dos rivalnan aki. Pariba Legends ta conoci como un ekipo fuerte, resultado di un spinoff di otro team conoci, esta Team Snor, y cu tur ora sa buta drama y haci e anochi un cos emocionante. Di otro banda, Team Biba Lekker t’e variacion fuerte bush league di un ekipo conoci den bond bou guia di “Biba Lekker Trimon”, y cu tin den nan militancia un dje unico certified instructor den domino! Cos aki ta priminti di ta un sambombaso total!

Manera semper, entrada n’e evento aki ta completamente gratis, y manera di custumber, chef di Domino Square Garden lo percura pa deleita un y tur durante halftime cu su snack y pasapalonan completamente por nada! Pues shonnan amante di bon domino, diasabra awor 4 di december, cuminsando pa 8’or di anochi n’e unico y mundialmente famoso Domino Square Garden! Yega!