Un homber ilegal na Aruba ta den man di husticia. E homber aki ta procedente di Colombia y tin asina hopi tempo na Aruba cu hasta ta papia papiamento hopi bon. Diabierna su careda di pompado na Aruba a yega na su fin. Ademas cu e mester duna cuenta pa su fechorianan, e lo wordo deporta tambe pronto. E homber ta pone su avisonan riba rednan social cu e ta drecha wasmachine. Hopi hende ta yama pa haci uso di su servicio. Ora cu e yega ta desmantela e wasmachine y bise e hendenan cu tal pieza ta malo. Asina e ta tuma placa pa busca pieza y nunca mas ta presenta. Semper e ta pidi algun shen florin. Ta varios keho tin contra dje. Diabierna a pidi su servicio. Na Wayaca recherche a prepara pa su yegada. Ora cu el a yega a pare pa un control di documento di auto. E auto cu e tabata stuur ta sin documento. Polis a confisca e auto y e homber a cuminsa sinti cu nan ta bay cu ne tambe. El a sali core den e mondinan di Wayaca cerca di oficina di recherche. Algun recherche a rondona e mondi y pone man riba dje. A hibe warda pa e duna cuenta. E auto sin documento a bay warda. A pone fin na su fechorianan di tuma placa pa drecha auto y no cumpli cu cliente. Esaki ta ladronicia y strategicamente y regularmente e tabata bezig cu esey. Pesey mes victimanan a duna keho y a traha den forma tactico pa recherche pone man riba dje y a logra tambe.