SOGA a tuma nota di un entrevista duna awe mainta door di Directiva di Hospital, y ta haci uso di e oportunidad aki pa confirma cu enberdad tin un desacuerdo entre SOGA y e General Contractor OHLA, di e proyecto di Expansion y Renobacion di Dr. Horacio Oduber Hospital. A base di e desacuerdo riba extensión di e terminación di proyecto e contratista a tuma e decision pa no sigui cu e proyecto di construccion. SOGA ta tumando tur e pasonan necesario pa sigura cumplimento cu e condicionan di e contrato y su derechonan.
Na tur previo ocasion, cu a surgi un diferencia di opinion, SOGA y OHLA semper a sa di yega na solucion, basa riba stipulacionnan den e contrato di construccion. Basa riba un interpretacion di e contrato, cu ta diferencia di e interpretacion di SOGA, OHLA a conclui cu e por bandona e trabou, mandando e subcontratistanan local cas. Esaki apesar di tur esfuerzo di banda di SOGA, Hospital y Gobierno di Aruba, pa evita esaki.
Siguientemente, SOGA lo trata pa yega na e acuerdonan necesario pa asina trabou por wordo reanuda lo mas pronto cu ta posibel pa termina e proyecto. Den e cuadro aki ta importante pa menciona cu gran mayoria di e trabou a wordo ehecuta door di contratistanan local como subcontratista di General Contractor, cu sigur lo kier keda contribui, pa duna nos comunidad e hospital cu e merece. E contratistanan local aki ta completamente capacita pa termina e proyecto pa locual cu falta.
SOGA ta consiente di e importancia pa e trabou di expansion y renobacion di hospital, pa cual falta awor menos cu 10%, wordo finalisa mas pronto cu ta posibel. SOGA su meta y compromiso ta pa e proyecto wordo completa ful y na un bon manera, pa asina nos unico hospital na Aruba por sigi duna e servicio mereci, na comunidad di Aruba y na e turistanan cu ta bishita nos isla.