EAGLE BEACH, Aruba – Mei 17, 2023 –
Bucuti & Tara Beach Resort a wordo nombra entre e mihor hotelnan na mundo segun Travel + Leisure. E resort exclusivo pa adulto ta e unico hotel di Aruba cu a sali riba e lista di 2023 T+L 500.
E bon noticia a yega for di Jacqui Gifford, redactor principal di Travel + Leisure y a wordo anuncia globalmente na April. “Mi ta contento pa comparti cu Bucuti & Tara Beach Resort ta wordo reconoci como un di e mihor 500 hotelnan na mundo den e edicion di T+L 500.”
Cada aña, e lectornan di Travel + Leisure – e publicacion di experiencianan di biahe mas grandi na Merca, cu un audiencia di mas di 36 miyon – ta vota pa nan destino preferi, hotel, resort, y mas den nan enquesta di World’s Best Awards. Basa riba e resultadonan di 2022, e lista di T+L 500 di 2023 ta reconoce e mihor hotelnan rond di mundo den un directorio prestigioso categoriza pa region geografico y ordo alfabetico. E lista aki di propiedadnan ta sirbi como un recurso confiabel pa miyon di biaheronan entusiasta.
“Den nomber di nos tur na Bucuti & Tara Beach Resort, nos ta sinti nos honra pa wordo reconoci un bes mas door di un di e autoridadnan di biahe mas confiabel, cual ta Travel + Leisure,” Ewald Biemans, doño/CEO di Bucuti & Tara Beach Resort ta conta. “Ofreciendo un biahe luhoso, personal y cu ta cuida nos isla como tambe nos planeta, ta nos pasion.”
E lista completo lo aparece den e edicion di mei di Travel + Leisure y riba Apple News+, cu un anuncio publica via travelandleisure.com.