Diasabra awor 3 di Juni for di 9or di mainta pa 3or di atardi, Aruba Lions Club ta organizando su “Health Fair 2023” na su club situa na Engelandstraat 11 na Eagle.
Aruba Lions Club cu mas di 75 aña sirbiendo comunidad cu diferente projectonan y judansa pa esnan den nececidad, e weekend aki riba diasabra lo tin su “feria di salud” caminda lo tin 5 seccion medico pa tur persona cu tin e nececidad pa hasi un control den un di e partinan aki y ricibi su servicio completamente gratis.
E seccionnan cu lo tin ta, control di presion di wowo y control di catarata cu ta e parti di wowo.
Tambe lo tin control di oido cu lo tuma lugar den edificio di FEPOH pa su mes empleadonan cu voluntariamente lo hasi e examinacion y lo wordo asisti pa Quota Club cu lo por hasi e parti di concientisacion.
Pa e parti di control riba diabetisch y colesterol lo ta presente Xavier University cu lo juda den esaki y alavez controla presion.
Mary Joan Foundation lo ta presente cu su equipo di mediconan cu ta bai hasi e trabou di examinacion y concientisacion riba cancer di pecho.
Locual no ta falta ta e projecto di “Smile Mobile” di Aruba Lions Club mes cu lo ricibi e dentadura di nos grandinan pa por hasi e limpiesa necesario durante e dia.

Nos por a mira cu ya trabounan di preparacion a cuminsa na e club pa asina ricibi diasabra awor tur persona cu ta den e nececidad pa hasi un control medico y asina si constata cualkier desviacion den esaki por ta na tempo pa haya un conseho pa sigui cu un control mas avansa.
E meta di e “Health Fair 2023” ta pa concientisa comunidad pa biba saludabel door di keda controla y ricibi e consehonan necesario pa mantene un curpa sano, manera e lema di e actividad aki ta bisa “Be Healty, Be Happy”.
Pa Aruba Lions Club esaki ta un projecto mas cu nan ta presenta pa comunidad y ta gradici di curason tur companianan, organisacionnan y tambe personanan individual cu ta para banda di e miembronan di Aruba Lions Club pa coopera den e trabou voluntario aki cu e club ta aprecia masha hopi, y ta nos tur hunto ta hasi un actividad asina posibel.
Aruba Lions Club ta warda boso diasabra y jega trempan pa por haya bo turno pa control.