ORANJESTAD – Departamento di Progreso Laboral (DPL) su departamento di
“Arbeidsmarktregistratie” (AMR) ta responsabel pa tuma formulario di
dunadornan di trabao y documenta esaki pa asina tur otro departamento di
DPL por uza e informacionnan importante aki. Ta trata di informacion manera e.o.; e necesidad y cantidad di personal, e funcionnan existente y necesario etc. Ultimo tempo AMR ta hayando asina hopi peticion pa cita y entrega cu a pone cu AMR su citanan a bira mas leu. Pa atende cu e asunto aki na un manera mas responsabel y eficiente posibel pa tur cliente, DPL ta bin cu un
campaña den luna di juni 2023 pa asina tuma y procesa mas hopi peticion
posibel entre 12 di juni 2023 te cu 30 di juni 2023.
Campaña pa entrega bo formulario di AMR 2023 libremente!
– Por entrega bo AMR entre 12 te cu 30 di juni 2023 sin mester haci un
cita online (walk in);
– Orario pa presenta na DPL ta di 8:00 am – 11:30 am y di 1:30 pm – 3:30
pm;
– Esnan cu a traha un cita caba tambe por presenta entre fechanan ariba
menciona libremente;
– Ora cu presenta na DPL mester cumpli si cu tur rekisito stipula
conforme e checklist di cada formulario di AMR 2023;
– Mester presenta cu un Copia di bo Checklist pa asina DPL stempel
“voor ontvangst” si acaso a cumpli cu tur rekisito;
– Mester yena tur formulario di AMR 2023 digital (getypt) pa nos acepta;
– Percura pa tur e documentonan (file completo) ta firma (no paraaf) cu
pen blauw;
– Ta importante pa e persona autorisa cu ta bin entrega e AMR 2023
presenta cu un identificacion (ID) valido pa motibo di registracion na
balie di DPL.
DPL kier a invita tur dunador di trabao cu ainda no a entrega of cu ainda no
tin un cita haci na AMR, pa haci bon uzo di e oportunidad aki.
