Diasabra anochi a drenta informe di cu tin un bringamento formal banda di Palm Beach Plaza, mesora a dirigi varios patruya na e sitio. Na yegada di e patruyanan a bin compronde cu e bringadornan a crusa caminda bay otro banda na e casnan di Palm Beach. Te cu na un dado momento e victima cu a ser hinca a bula drenta cura di cas di otro hende pa proteha su mes.

Ora cu polis a bay otro banda di caminda e agresornan a core bay for di e sitio. Polis a inicia cu un buskeda y a logra haci detencion di e prome sospechosonan. Na yegada di e ambulans a atende e victima cu tabata tin un hinca y tabata sangra, nan a transporte cu urgencia pa hospital. Polis a pidi pa recherche y e investigadornan technico y forensyco presenta na e sitio pa inicia e investigacion forensyco y pa esey a sera e caminda unda e cosnan a sosode.