ORANJESTAD: Diamars mainta, Minister di Enseñansa y Deporte Endy Croes a atende CKV Dag di scol secundario Maria College na Cas di Cultura. Alumnonan di aña un (1) te cu tres (3) di Maria College mester a cera e materia di Culturele en Kunstzinnige Vorming (CKV) di un forma practico. Pa e motibo aki, cada klas a duna un presentacion na Cas di Cultura como evaluacion final di e materia. E tema di CKV Dag di e aña aki ta Passport to Success. Cada aña a haci un presentacion basa riba un topico cu ta relata na e tema principal. Topico di aña un (1) ta trata di Motivacion, aña dos (2) Arubiano Exitoso y aña tres (3) Globalisacion. Cada klas a uza nan creatividad durante nan presentacion y tabatin hopi entusiasmo. Minister Endy Croes ta aplaudi e alumnonan di Maria College pa e tremendo presentacion cu nan a haci. Alabes ta felicita henter e team di Maria College pa e excelente trabou den ekipo pa organisa e bunita actividad escolar aki.