Actividadnan publico cu studiantenan arkeologia di Universidad Leiden na MANA

Durante luna di juni, 4 studiante di Universidad Leiden ta hasi nan stage pa 3 siman, bou supervision y guia di candidato doctorado(PhD) arkeologia, Harold Kelly. E practica ta den cuadro di sr. Kelly su investigacion tocante Cambio di Clima y rastronan arkeologico y ta parti di e proyecto internacional y multi-disiplinario ‘Islanders at the Helm’/ Isleñonan na Timon. Tur cuater ta enfoca riba e region di Caribe y ta pa prome biaha cu nan ta core stage haciendo excavacion den e region aki. Ta participa e studiante Arubiano Naomi Wever y e studiantenan Hulandes Zoë van der Biezen, Emma Krijger y Kai Tjong-Ayong.

Ta trata di un ‘fieldschool’ cu ta un orientacion practico como parti di e estudio arkeologico, bou guia di un coach/mentor. E prome dos siman nan ta experencia entre otro con pa habri diferente buraco, coba, sefta, traha rapport di dia y documenta sitio. E ultimo siman nan lo procesa e materialnan arkeologico haya.

Durante nan estadia na Aruba, MANA ta brinda publico oportunidad pa intercambia informacion/pensamento cu e studiantenan y participa activamente of observa nan trabou. Por observa e trabou di limpiesa y labamento di e material Arkeologico, loke ta rekeri traha sistematico y cu cuidao. Publico limita por yuda laba e material bou supervision di arkeologo Harold  Kelly y e studiantenan. E evento aki ta tuma lugar diasabra 24 di juni awor entre 8 ‘or y mei y 11’or y mei mainta na MANA. Ta regula admicion di interesadonan pa e evento aki.

E diabierna prome, 23 di juni entre 5’or di atardi pa 7’or di anochi na MANA, e 4 studiantenan lo papia riba nan bida, diferente aspecto di nan estudio, studiamento na Hulanda y nan experiencia na Aruba.  Harold Kelly lo presenta su trayectoria, experiencia como hoben, studiante y awor como profesional. Lo brinda posibilidad tambe pa papia directo of den grupo chikito informal cu e studiantenan y Harold Kelly. Di e forma aki hoben-  y  mayornan por haya un otro bista kiko ta nifica prepara y bay studia pafor di Aruba.  E ta un oportunidad unico pa di otro manera nos hobennan por enfrenta futuro mihor prepara.

Museo Arqueologico Nacional Aruba (MANA) cordialmente ta invita publico general, mayornan y specialmente hobennan pa presencia e eventonan riba 23 of 24 di juni awor. Entrada ta liber!

Share:

Leave a Reply

Your email address will not be published. Required fields are marked *