ORANJESTAD: Dia 10 di juni ultimo, Sr. Chua Faro, a celebra su 75 aña di edad hunto cu famia-, bisiña- y amistadnan na Hoffie Seroe Janchi. Minister Endy Croes tabata presente na e ocasion special aki. Un fiesta familiar hopi bunita, hopi grandi y sigur cu hopi ambiente cu a bay te den ora laat di marduga. Entretenimento tabata den man di Caha di Orgel y Sr. Robert Maduro y banda Azucar a deleita esnan presente cu nan tremendo musica y repertorio. Un ambiente formidabel a reina den pueblo di Noord. Minister Endy Croes a hiba palabra pa felicita Sr. Chua Faro.
Sr. Faro ta un persona hopi conoci na Aruba, specialmente den e districto di Noord. Sr. Faro tabata un candidato riba lista di MEP desde aña 1985 y a participa na por lo menos tres eleccion. Tambe, Sr. Faro a fungi como miembro di directiva di Arubaanse Voetbal Bond. Pues, Sr. Faro tin deporte y sigur e disciplina di futbol na su curason.
Minister Endy Croes ta gradici Sr. Faro pa e invitacion y momentonan bunita cu por a comparti hunto cu famia pa celebra e cumpleaños di e baluarte di Noord. Alabes Minister Endy Croes ta desea Sr. Chua hopi bendicion y ta felicita Sr. Chua cu a cumpli e bunita y respetoso edad di 75 aña.
