Calabas/Kudawecha – Diahuebs 15 di juni tabatin e tan spera sambombaso di domino entre Team Snor, bou liderazgo di e conocido ‘Snor’ Perez, contra e trabucnan di Taxi Boys, bou guia di Captain Saladin. E ya famoso Domino Square Garden aya na Kudawecha tabata rand rand di fanatico y partisipante den un ambiente ‘a chuparse los dedos’!

E bataya ta start poco ‘ferfelu’ pa Snor, ya cu pa halftime score ta 11 – 6 na fabor di Taxi Boys, y Team Snor a haya dos sapato blanco blanco caba! Den seno di Team Snor tin locual na Hulanda nan ta yama ‘een storm in een glas water’! Management crisis total y tin cambio di ‘pitcher’ pa Team Snor, Captain Magda ta tuma timon. Despues cu e pasapalonan gratis a baha na ordo, Team Snor a subi mesa cu animo halto ya cu nan ta bou ‘new management’. Y dicho hecho, cos ta cuminsa bolter pocopoco pa Team Snor ya cu si prome cu halftime cos tabata ‘un pa nos – dos pa nan’, awo gradualmente cos a cuminsa bolter den ‘dos pa nos – un pa nan’! Team Taxi ta yega 20 punto, y Team Snor ta enfrenta lomba contra muraya cu 16 punto. Pero, Captain Magda ta ‘ijzersterk’ y ta nenga di dobla bou presion. E wega ta na 20 – 17 pa Taxi … 20 – 18, 20 -19, y sensacionalmente contra tur expectativa Team Snor ta empata na 20 -20!

Furor total na Domino Square Garden, pero ata … e famoso triki caminda tur hende ta haya un ‘kleine boodschap’ y tin cu core bay baño a cuminsa! E pober porta dje baño a keda mescos c’un draaideur di un luga cu ta parti placa por nada! Na final, memey dje pandemonio, un grito laaaargo ta cay … TAXI BOOOOYS!!! Y dje forma aki ta yega final na un partido sumamente excitante y emocionante caminda Taxi Boys ta gana nip-nip cu 21-20! Shonnan, keda pendiente pasobra 24 di juni Team snor lo los otro sambombaso atrobe contra Bou Dak Boys! yegaaa!