Calabas/Kudawecha – Team Snor, e unico ekipo na mundo cu tin uniform ‘custom made’ ta a l’atake un biaha mas. Ni apenas un siman pasa cu Team Snor a percura pa un berdadero sensacional derota contra nada menos cu ‘the wild bunch’ di Taxi Boys, cu awor nan bista a cay riba e trabuconan di Gibi ‘The Coordinator’ Webb. E gang di Gibi, miho conoci como Team Bou Dak, un biaha mas lo tin cu bay soporta e furia di Team Snor diasabra awor 24 di juni, cuminsando pa 8’or di anochi bou huma pisa di San Juan den e unico y mundialmente famoso Domino Square Garden aya net n’e grens entre Calabas y Kudawecha. Shonnan amante di domino, otro sambombaso di wega!

Lider di Team Snor, esta e flamante Nelson ‘Snor’ Perez, a declara den un entrevista exclusivo cu e biaha aki no solamente nan uniform lo ta ‘custom made’, pero tambe nan pampers, pa si e wega yega 20-20 atrobe, tur integrante di Team Snor por keda sinta y wanta e presion sin tin nodo di core masalmente pa baño manera biaha pasa contra Taxi Boys. Wel shonnan, manera nan ta bisa na Hulandes, dat beloofd wat! Manera semper, entrada ta completamente gratis pa un y tur fanatico di tremendo domino, y durante halftime, e pasapalonan ta totalmente por nada. Portanan lo ta habri desde 12 di merdia pa asina por gara e VIP asiento ey cu un y tur ta anhela. Pues shonnan, un candela foi control ta bay tin diasabra awor cuminsando pa 8’or di anochi aya na Domino Square Garden ora cu Team Snor enfrenta nan rival eterno Team Bou Dak, bou guia di Gibi ‘The Coordinator’ Webb. Yegaaa!