Recientemente a bin un reconocemento cu por logra un maneho eficiente di e ecosistema si tin un bon
comprondemento y integracion di e relacionnan entre comunidad y naturalesa. E reto pa maneho di e ecosistema basa riba solucionnan di naturalesa ta cu e ambiente global semper ta cambia y algun
di e practicanan di antes por conduci na degradacion di ecosistemanan.
Por ehempel, door di kima, esaki ta afecta medio ambiente y ta resulta den cambio di clima acelera.
E solucion por ta sinta den un maneho integral di ecosistemanan, cu ta inclui e rol di cultura pa asina alcansa e demandanan di naturlaesa, y hende p’asina trata e cambionan global y maneha mihor e ecosistema y bienestar di hende. Por logra esaki door di promove conservacion di biodiversidad pero tambe logra esaki door di yuda comunidad compronde cu un mal custumber por trece
impactonan negativo cune. Cultura of tradicion di Dera Gay y e asunto di kimamento no
kiermen cu nos ta actua contra ley of causa daño na nos salud, e naturalesa y medio ambiente. Pa e motibo aki DNM kier avisa pueblo tambe pa pone atencion na e siguiente puntonan:
Ta prohibi pa cende candela riba caminda publico. Esaki ta prescribi den articulo 14 di e ordenansa di polis (APV).
Segun articulo 8 di APV, ta prohibi pa causa molester na
bisiña por ehempel door di cende candela y kima.
Pone atencion na unda ta cende candela. Tin tereno di naturalesa cu ta protegi pa ley y ta prohibi pa cende candela den e areanan aki. Manera Spaans Lagoen, Parke Nacional Arikok, y nos areanan di parke marino. E motibo pa esaki ta cu e candela por causa daño y perdida di na nos flora y fauna, por ehempel matanan di mangel, otro matanan di balor, parhanan, cangreunan y otro sortonan.
Ban celebra e dia di Dera Gay 2023 na un manera responsabel y reduci e impacto cu kimamento tin pa nos naturalesa, medio ambiente y salud. Esaki ta e mihor deseo di DNM.
