ORANJESTAD – Departamento di Progreso Laboral (DPL) a tuma nota di un publicacion den prensa riba dia 5 di september 2023 relaciona cu un sucedido caminda cu City Inspector a bin haya un cantidad di sushi tira na un dump ilegal den Franse Pas. Den e relato aki ta menciona cu a bin haya un cantidad di documento di e compania Caribbean Bingo como tambe di DPL. Como un departamento di Gobierno responsabel mesora a tuma e accionnan necesario pa asina averigua con esaki por ta posibel mirando cu como departamento tin reglamento y proceduranan estricto stipula di con ta anda cu procesamento di sushi y particularmente documentonan di e departamento cu ta contene informacion di cliente. Pa medio di esaki DPL ta aclarea cu DPL no ta responsabel pa e actonan aki y ya caba a tuma e pasonan necesario pa atende debidamente cu e susedido aki. DPL tin su maneho interno y di Gobierno estricto cu ta mantene na momento di warda (archief) y/of despues di un periodo stipula di con ta procesa documentonan bieu (destruccion bao supervision estricto). DPL ta lamenta cu e susedido aki a bay di e forma aki caminda ta pone e imagen di e departamento den un lus negativo.