Premier Evelyn Wever-Croes a confronta nan riba nan propio criticanan di un aña pasa
Rijkswet Aruba Financieel Toezicht, RAft, desde cu el a wordo proponi, no a conta cu sosten
di partidonan politico na Aruba. E tempo ey, un aña pasa, Parlamentarionan di Partido MAS,
Marisol Tromp y Aquanette Gunn, a vocifera fuertemente nan analisis di RAft y a expresa
preocupacion serio contra e RAft. Den un aña, e representantenan publico aki den Parlamento
a cambia di opinion y durante e reunion di diahuebs, den un mocion presenta, a urgi Gobierno
di Aruba pa acepta e RAft “as is”.
Den e relato oficial di Parlamento, Parlamentarionan Marisol Tromp y Aquanette Gunn a
indica cu e RAft lo kibra Aruba su economia. Nan a exigi pa haci prome un analisis di e
sostenibilidad di e debe publico di pais Aruba. Ademas nan tawata di opinion cu e RAft no a
wordo bon prepara. Finalmente nan a exigi pa cambia e RAft pa prohibi ex politiconan bira
miembro di CAft. Hulanda sinembargo, no a tene cuenta cu ningun di e puntonan aki y nunca
e Parlamentarionan di Partido MAS a haya contesta riba nan preguntanan.
Apesar di e preocupacion serio di Parlamentario Tromp y Parlamentario Gunn un aña pasa, e
siman aki e parlamentarionan a lubida con serio nan tawata of con preocupa nan tawata pa
economia di nos pais y a urgi Gobierno pa firma e RAft “as is”, sin worry mas cu nan propio
argumento cu RAft ta kibra economia di pais Aruba. Durante e reunion Premier Evelyn
Wever-Croes a confronta e parlamentarionan aki riba nan propio criticanan tocante RAft di
un aña pasa y a demostra cu di berdad nan no ta sirbidornan di pueblo serio y mucho menos
preocupa cu e bienestar economico di nos pais.