OPINIESTUK:
Fundashon Kòrsou Transparente ta reflektá riba 10 aña di rapòrt di Transparency International tokante riesgonan di korupshon na Kòrsou
Ya a kumpli 10 aña ku Transparency International a presentá e “National Integrity System assessment” tokante e vulnerabilidatnan ku Kòrsou tin pa ku korupshon. E organisashon a publiká un rapòrt impreshonante na 2013 ku un lista di rekomendashon ku medidanan dirigí. Un grupo di persona ku tabata envolví na e momentu di strukturá e rapòrt a tuma e desishon di funda e movementu sivíl “Fundashon Kòrsou Transparente” despues di e publikashon di e rapòrt. E grupo aki kier a evitá ku e rekomendashonnan di e rapòrt lo desaparesé den un lachi.
Nos ta eksaktamente 10 aña despues. Na unda nos ta awe? Kòrsou Transparente lo pone atenshon den e lunanan benidero na resultadonan i rekomendashonnan for di e rapòrt di e tempu ei i lo tira un bista kon nos ta progresa de e situashon aktual. Awe nos ta kuminsá ku un repaso riba e resultadonan di e investigashon.
Transparency International ta konsiderá ku prevení i kombatí korupshon den un pais ta rekerí un enfoke integral. Ta trata di e interakshon di diferente aktor institushonal, nan aktividatnan i e interakshon entre nan. For di e perspektiva aki, Transparency International a evalua 14 pilar krusial ku ta forma e paisahe institushonal di Kòrsou (mira e kuadro athunto). E investigashon a identifiká tantu pilar fuerte komo esnan débil den e sistema di integridat nashonal di Kòrsou. E rapòrt ta ofresé un enfoke profundo riba e resistensia i efektividat, di institutonan i diferente sektor, den prevenshon i konbatímentu di korupshon i promové transparensia i integridat.
Sistema di Integridat
E 14 pilar ku a evalua durante e investigashon ta inklui entre otro Parlamentu, Gobèrnu, e sistema di hustisia, instanshanan gubernamental, instanshanan ku ta atende ku ordu públiko, partidonan polítiko, medionan di prensa i sektor privá. Kada pilar a wordu evalua riba tres aspekto importante ku tin influensia riba e kapasidat pa prevení korupshon: kapasidat en total, gobernashon i prosedimentu interno i e kuadro general den e sistema di integridat en total. For di kada pilar, nan a mapeá tantu e marko legal i regulashonnan, komo e implementashon den práktika.
KvK 135804 | korsoutransparente@gmail.com | www.facebook.com/KorsouTransparente.

Pilarnan fuerte i débil
Na 2013, segun Transparency International, e podèr hurídiko, Ombudsman i instànshan di kontrol i supervishon a wordu identifiká komo pilarnan fuerte den e sistema di integridat di Kòrsou. Generalmente, e organisashonnan aki tabata konsiderá konfiabel, pero nan efektividat tabata wordu obstakulisá pa debilidatnan den otro pilarnan. Na otro banda, partidonan polítiko, sektor públiko i media a wordu identifiká komo pilarnan débil, ku tabatin un influensha negativo riba e sistema di integridat di Kòrsou.
Un aspekto krusial ku a keda resaltá tabata e falta di transparensia i responsabilidat ku partidonan polítiko tabatin. Finansiamentu di partidonan polítiko tabata wordu konsiderá insufisientemente regulá, ku a resultá den skor nan abou den e tópiko di transparensia pa e pilar aki. Pa restablesé konfiansa di públiko den e proseso polítiko, a enfatisá e importansia di promové transparensia i kuentanan kla den finansiamentu di partidonan.
Además, e investigashon a mustra e retonan di e sektor públiko tokante integridat. E influensha fuerte ku e poder ehekutivo (Parlamentu) tin riba nombramentu i desishonnan di polítika a wordu evalua komo un obstakulo pa un bon funshonamentu efektivo di e sektor públiko. Tanto un akshon “hands-on” di e poder ehekutivo komo un falta di akshon, por limitá e kapasidat di e sektor públiko pa funshoná efikásmente. Pa garantisá integridat den e sektor públiko, a rekomendá pa atendé e asuntonan aki.
Un otro pilar ku segun Transparency International mester a atendé tabata medionan di komunikashon. E importansia di un prensa krítiko i independiente den denunsiá abusonan i tambe informá públiko, a wordu konsiderá esenshal. A enfatisá riba e nesesidat di mas periodista (di investigashon) kualifiká, e importansia di redukshon di dependensia di finansiadó privá i entrada di propaganda/promoshon pa por garantisá independensia di medionan di komunikashon.
Banda di e resultadonan tokante e partinan fuerte i débil, e rapòrt tambe ta menshoná hopi vulnerabilidatnan den otro pilarnan, manera e base legal débil di e konseho elektoral i e eskasés di rekursonan finansiero den e servisio di polis i instanshanan hudisial.
Rekomendashonnan
Basá riba e resultadonan, Transparency International a proponé e siguiente kuater (4) rekomendashonnan prinsipal.
1. Kòrsou mester ratifiká ku urgènsia e Konvenshon di Nashonnan Uní kontra korupshon i desaroyá un plan di akshon pa garantisá implementashon i sigimentu di e konvenshon aki.
2. Tur sektor den komunidat mester enfoká pa aumentá nivelnan di transparensia den nan aktividat, prosedimentunan interno i fuentenan di finansiamentu. Partidunan polítiko, spesifikamente, mester atendé esaki ku urgensia.
3. Gobèrnu mester duna prioridat na finansiamentu i desaroyo di kapasidat di instánshan hudisial pa laga nan investigá i tuma akshon riba kaso ku ta ser presentá pa instánshan di kontrol i supervishon.
4. Mirando e rol general ku e sektor públiko ta representá, gobèrnu mester komprometé su mes pa mas independensia i sentido di responsabilidat den e sektor públiko, siguiendo prinsipionan di bon gobernashon i garantisá ku tur mekanísmo interno pa duna kuenta i
KvK 135804 | korsoutransparente@gmail.com | www.facebook.com/KorsouTransparente.

rason I promové integridat ta existí. E implementashon di e mekanismo aki mester wordu kontrolá i sankshoná kaminda ta nesesario.
E rekomendashonnan prinsipal i e situashon actual na Kòrsou lo hanja atenshon den e artíkulonan ku ta sigi den e serie aki di Kòrsou Transparente.
Fundashon Kòrsou Transparente ta un inisiativa sivil, ku a surgi despues di investigashon di Transparency International. E meta di e fundashon ta pa konsientisá nos komunidat tokante e efektonan dañino di korupshon, e importansia di integridat i pa stimulá publiko en general pa demandá un Kòrsou íntegro. Pa okashon di e aniversario di 10 aña di e rapòrt di NIS, Kòrsou Transparente ta organisá riba 8 di desèmber 2023, na okashon di Dia Internashonal di Lucha kontra Korupshon di Nasionnan Uni, e seminar ‘Un Gobernashon Íntegro: Un kondishon esensial pa un kresementu sostenibel i duradero na Kòrsou’. Detayenan adishonal ta wordu anunsiá pronto. Den preparashon pa e fecha aki, Kòrsou Transparente lo publiká un serie di artíkulonan kaminda lo enfoká riba rekomendashonnan espesífiko for di e investigashon. E artíkulo aki ta e promé un den un serie di 6.
Fuente
Transparency International, Asesmentu di Sistema di Integridat Nashonal Kòrsou 2013. https://www.transparency.org/en/publications/national-integrity-system-assessment-curacao-2013
Varios miembronan di bestür i konseho konsultativo di Kòrsou Transparente a kontribuí na e artíkulo aki.