Aruba Flight Simulator Club ta presenta un anochi informativo pa tur amante di aviacion y muy especialmente pa tur esnan cu ta interesa den e hobby di Flight Simulator. Esaki ta tuma lugar dialuna 25 di September venidero di 7’or pa 9’or di anochi na Centro di Bario Lago Heights.
Durante e anochi aki lo tin diferente topico interesante, entre otro bulamento online, informacion di e club, experiencia di miembronan y hopi mas.
Kico ta Flight Simulator? Esaki ta basicamente un wega caminda bo por practica bula avion riba un computer, cual ta wordo usa pa piloto y controladornan aereo. Por medio di internet ta possible pa topa otro online y bula hunto virtualmente. Esaki ta encera cu ta simula operacion aereo virtualmente unda tin communicacion entre pilotonan y controladornan aereo y tambe por mira otro avionnan den sercania.
Na aña 2005 e prome reunion di Flight Simulator a wordo teni na Aruba, unda a bin nota cu tin hopi interes pa cu esaki. Aruba Flight Simulator Club a wordo funda 24 februari 2006 pa stimula, educa y purba trece interesadonan serca otro.
Bo ta interesa den Flight Simulator y aviacion en general? Bo lo kier bira miembro y forma parti di nos Club? Wel, ata bo chens ki. Join nos dia 25 di September 2023 di 7or pa 9or di anochi na Centro di Bario Lago Heights. Pa confirma lugar of pa cualkier informacion tocante nos evento di Aruba Flight Simulator Club, por tuma contacto libremente cu Renier Flores na renierflores@hotmail.com of 560-2701. Aruba, nos ta topa P’ariba!
