ORANJESTAD: Minister Endy Croes a ricibi director di Lotto pa Deporte Sr. Junny Figaroa na Bestuurskantoor, unda nan a hiba un tremendo reunion. Minister a combersa hopi di su vision y e ambicion pa inverti den deporte, tanto pa yuda e federacion- y atletanan pa nan desaroyo, pero alabes inverti den infrastructura di e facilidadnan cu a keda hopi atras.
A repasa status di Compleho Deportivo Guillermo Prospero Trinidad na Dakota:
Minister Endy Croes a duna un “update” riba e detayenan di e proyecto di renobacion di Compleho Deportivo Guillermo Prospero Trinidad na Dakota. Manera ta conoci, e stadion aki a wordo desaproba desde aña 2016, unda nos weganan di seleccion di futbol desde e aña ey mester a tuma luga den exterior. Manera Minister Endy Croes a tuma rienda, desde september di aña 2021 a haci un promesa publico cu lo renoba e stadion aki. Danki na Gobierno di Aruba, kendenan a bay di acuerdo pa aloca un suma substancial y Lotto pa Deporte cu a inverti 1 miyon florin pa por a yuda inicia e proyecto aki na luna di februari di aña 2023. E parti concreto ta wordo ful renoba, instalacion di coriente y e airconan ta wordo completamente reemplasa pa uno mucho mas moderno. A aloca un yerbe artificial “state of the art” cu ta wordo certifica pa FIFA y lo pone un athletiekbaan marca MONDO cu ta “top quality”. Pues tur cos ta canando bon.
A repasa mas proyecto:
Minister Endy Croes a splica cu lo inicia pronto un proyecto pa instala cuater (4) veld di futbol cu luz, esta e veldnan cu no tin luz y tambe lo percura di acuerdo un plan structural reemplasa tur e luznan existente pa LED light y aki tambe ta desea pa Lotto pa Deporte inverti den e proyecto bunita aki. A splica director di Fundacion Lotto pa Deporte e tantisimo peticionnan cu drenta pa ayudo y claro no por yuda tur hunto, pero lo traha di acuerdo un plan. Sr. Junny Figaroa a splica di su banda e status cu Fundacion Lotto pa Deporte ta aden actualmente, cu ta e fase pa tuma e maneho di loteria bek cual lo tuma luga prome cu fin di aña y aki lo bin mas fondonan disponibel pa deporte.
Minister Endy Croes a brinda infomacion di e proyecto Palo Marga, unda tanto Gobierno di Aruba y Fundacion Lotto pa Deporte a inverti den esaki, alocando 26 poste di luz cu luznan LED ultra cla. A renoba Veld di Brazil, Veld di Flatstone, Veld di Brazil, Veld di Flatstone, Baskeball Court Village, Steetwise BMX Track. Tambe, a aloca luz na BMX Track Jaburibari, luznan na Aruba Juniors a haya atencion y asina por a nombra tantisimo ayudo cu e veldnan ta hayando.
Minister Endy Croes a termina splicando cu den e ultimo 10 añanan, desde 2010 bin ariba casi no por a mira ningun inversion di placa di Lotto pa Deporte den deporte realmente. Solamente mester a cambia e Raad van Toezicht (AVP), kendenan a sinta 12 aña largo y alabes pone un director cu tin deporte como su pasion y hunto cu un plan y den tremendo colaboracion por mira cuanto proyecto ta andando. Por mira realmente unda bo placa di Lotto pa Deporte ta bayendo. Lo bay tin hopi mas!
