Pronto Aruba tin un hoya di stadion certifica pa FIFA y pa World Athletics
ORANJESTAD: Manera ta conoci, e stadion na Dakota ta den proceso di renobacion desde algun luna atras. Tin hopi trabou ta tumando luga na e stadion y ta trahando den ful swing pa por keda cla e aña aki. Algun siman atras, e compania profesional di Merca AstroTurf a bin Aruba pa a aloca e yerbe artificial nobo na Compleho Deportivo Guillermo Prospero Trinidad. AstroTurf a finalisa cu nan trabou y entrega Minister Endy Croes un certificacion cu garantia di ocho (8) aña pa e trabou cu nan a haci. Dialuna ultimo, e representantenan di Sports Labs staciona na Merca, un compania independiente, tabata na Aruba pa haci un evaluacion di e veld nobo. Minister President Evelyn Wever – Croes a representa Minister Endy Croes, na e ocasion aki, y a combersa cu e representantenan pa asina haya informacion di con e evaluacion ta bayendo. Sports Labs ta un compania cu su base ta na Irlanda y su headoffice na Scotland y tin 9 filial rond mundo, entre otro, na Louisiana North America kendenan ta haci “indepedent testing” pa federacion- y asociacionnan rond mundo manera FIFA y World Atletics riba e veldnan cu ta uza yerbanan artificial, Track and Field y demas ekipo. Unabes e resultado keda cla, Sports Labs ta traha un Performance Field Report hopi detaya y ta manda e report aki pa FIFA. FIFA su expertonan ta verifica e resultadonan obteni y ta compara esakinan cu e standard y exigencia cu FIFA ta rekeri y si e veld ta apto y ta cumpli cu e standardnan, FIFA ta bay over na traha un Certificacion di FIFA pa dicho veld. Esaki kiermen cu tur e weganan internacional y clasificatorio ta wordo permiti pa hunga riba dicho cancha. Tur e testnan necesario a wordo haci caba y cu tur cos ta mustra di ta bon y cu veld di Stadion GPT Dakota ta cumpli y ta “pass”! E resultadonan di e testnan di laboratorio, entre otro, ta indica si e yerbanan artificial ta apto pa e deportistanan por practica nan deporte sanamente contando cu e “safety” y exigencianan necesario. Pa Gabinete Wever-Croes II, deporte ta un prioridad halto riba nos lista y p’esey ta haci inversionnan necesario pa por tin facilidadnan cu ta cumpli cu e standardnan internacional. Nos ta hopi contento cu e resultado cu nos por a mira.
Seleccion di Aruba ta hunga 14 di october na Aruba:
Adicional, Minister Endy Croes ta confirma cu seleccion masculino di Aruba ta hunga su prome wega di CONCACAF Nations League bek na Aruba dia 14 di october proximo. Desde 2016 e stadion ta desaproba pa FIFA y tur nos seleccionnan mester a hunga pa 7 aña largo weganan clasificatorio pafo di nan pais, esta sea na Curaçao of na Florida. Seleccion di Aruba lo topa Virgin Islands dia 14 di october proximo na Aruba. Pa finalisa, Minister Endy Croes ta gradici tur stakeholder cu a haci e proyecto aki posibel alabes ta invita Pueblo di Aruba pa ban sostene nos seleccion dia 14 di october proximo.
