Oranjestad, Aruba – 2 di October 2023 – Gihae Gymnastics Aruba ta inmensamente contento pa anuncia su participacion na e Copa IGA Internacional na Panama, cu lo tuma lugar e fin di siman aki.

E prestigioso competencia lo conta cu presencia di gimnastanan sobresaliente di varios paisnan manera Colombia, Ecuador, Paraguay, Jamaica, Venezuela, Sto Domingo, Mexico y naturalmente Panama pa menciona algun.

Copa IGA Internacional ta sirbi como plataforma pa gimnastanan talentoso mustra nan habilidad, dedicacion y pasion pa e deporte. Gihae Gymnastics Aruba lo manda un equipo talentoso di gimnastanan di diferente nivel pa representa e club.

Bou guia di entrenadornan experiencia, e gimnastanan di Gihae Gymnastics Aruba a tene entrenamentonan intensivo y a perfecciona nan habilidad pa e evento monumental aki. Nan esfuerzonan, perseveransia y compromiso pa excelencia a prepara nan pa competi contra algun di e mihor gimnastanan di nos region.

“Nos ta sumamente orguyoso y entusiasma pa presencia nos gimnastanan di Gihae Gymnastics Aruba den Copa IGA Internacional,” Melissa Noguera a informa. “E competencia aki ta brinda un oportunidad fantastico pa nos atletanan mustra nan talento y competí riba un scenario internacional. Nos a traha hopi duro pa prepara nan, y nos tin confiansa den nan habilidad pa demostra e berdadero spirito di gymnasia di Aruba.”

Gihae Gymnastics Aruba ta extende su gratitud na e organisadornan di Copa IGA Internacional pa organisa un evento asina importante y brinda un plataforma pa atletenan di gymnasia uni y demostra nan habilidad.

Gihae Gymnastics ta un club prominente di gymnasia basa na Aruba dedica na e desaroyo di gimnastanan y asina promove e deporta na Aruba. Gihae Gymnastics ta ofrece un programa di entrenamento comprensivo pa tur edad y tur nivel. E organisacion su focus principal ta pa crea talento, infundi disciplina y fomenta un amor duradero pa e deporte di gymnasia.

Gihae Gymnastics – “Where Champions are made, Success Stories are written & Athletes become Legendary”.