Un apertura colorido na unda mandatario di Deporte a lansa e prome bala.
ORANJESTAD: Dialuna anochi, den un Joe Laveist Sport Park yena di fanatico a tuma luga e gran apertura di e di tres (3) edicion di Baseball in Paradise. E campeonato di Baseball in Paradise ta organisa pa Future Star Baseball Academy. E campeonato ta tuma luga di 9 pa 14 di october den diferente stadion rond di Aruba. Alrededor di 700 hungado y 38 ekipo di, entre otro, Boneiro, Curaçao, Hulanda, Mexico y Aruba ta batayando den e tremendo campeonato aki. Un total di 130 wega ta wordo hunga den e siman aki den e siguiente categorianan: U12, U14, U16 y U19. E weganan ta tuma luga na, entre otro, Joe Laveist Sport Park, Duracell Ballpark (Dragon Hitters Ballpark), Xander Bogaerts Ballpark, Crismo Angela y Nadi Croes Ballpark y Centro Bario Noord. Durante e bunita y colorido ceremonia di apertura di Baseball in Paradise Minister Endy Croes tabata presente y a hiba palabra na e ocasion aki pa desea e hungadonan exito. Ministerio di Deporte ta sostene e proyecto aki pa tres aña consecutivo. Minister Endy Croes a enfatisa cu e vision di Gobierno di Aruba ta pa promove ‘sport tourism’ y esaki ta un forma na unda cu organisadonan mes ta bin cu e iniciativa pa organisa un campeonato di e magnitud aki y ta trece riba 700 persona entre hungado, mayor y nan famia Aruba. Durante nan estadia na Aruba, nan ta hospeda na hotel, huur auto y bishita diferente sitio rond di Aruba y esaki ta duna contribucion na e vision di Gabinete Wever – Croes II.
Ta di aprecia cu un publico grandi a presenta pa apoya nos beisbolistanan. Nos atletanan a gosa masha hopi y riba ritmo di brassband a clausura e ceremonia di apertura. Mandatario di Deporte ta gradici organisado Sr. Shurty Tremus, Sra. Nenny Kamperveen y e organisacion di Future Star Baseball Academy tanto na Hulanda como na Aruba. Tambe, Minister Endy Croes ta gradici tur stakeholder entre otro, ATA, Lotto pa Deporte cu a haci e campeonato aki posibel.
Concluyendo, Minister Endy Croes ta invita henter e Pueblo di Aruba pa duna apoyo y sosten na e hobennan durante e siman aki. Masha pabien na e organisado cu un bunita show di apertura y hopi exito na e atletanan! Cu deseo, disciplina, dedicacion y determinacion ta logra.
