ORANJESTAD: Diasabra anochi, S.V. Britannia a celebra su 65 aniversario cu un tremendo wega amistoso contra di S.V. Vitesse di Boneiro. Minister Endy Croes y colega Minister Ursell Arends tabata presente na e ocasion special aki. Minister Endy Croes tabatin e honor di hiba palabra unda a felicita S.V. Britannia cu nan 65 aña di existencia. S.V. Britannia ta funda dia 12 di october 1958 pa un grupo di hoben den bario. S.V. Britannia tin un trayecto largo unda e ekipo a crece durante aña. E prome wega oficial di S.V. Britannia tabata na aña 1960 contra ekipo di Vitesse di Cashero, unda e pumanan di Piedra Plat a sali victorioso cu score di 3-1. Den su trayectorio S.V. Britannia tin cuater (4) titulo di campeon di Aruba. S.V. Britannia tin ocho (8) titulo campeon di Copa Betico Croes. Tambe, S.V. Britannia a hunga cinco (5) wega di Caribbean Championship contra, entre otro, Surnam, US Virgin Islands, Trinidad y Tobago y Haiti. Mandatario di Deporte a enfatisa cu mester corda riba esnan cu a yuda funda e club, nombernan grandi cu pa semper lo keda graba den historia manera; Sr. Vale Croes di Galeria Moderna, kende ta toca mi na famia a fungi como e prome presidente di S.V. Britannia. Sr. Vale Croes lanta cerca banda di e veld aki, na cas di mama Ia, Sra Martilia Croes den feliz memoria. Tambe, nos ta corda Sr. Ripoldo Croes, Sra. Lika Werleman y Sr. Vale Hernandis. No por keda sin meciona Sr. Eddie Berg y Sr. Franklyn Bareño cu tin 45 aña activo y ta e motor tras di S.V. Britannia. Sr. Berg sigur ta un lider, visonario, e persona cu a pusha pa e club aki. Minister Endy Croes a enfatisa cu poco biaha bo ta haya hende cu ta permanece 45 aña y ta pusha pa un club asina. Mandatario di Deporte a gradici y felicita presidente actual di S.V. Britannia Sr. Cedric Werleman y henter su directiva cu 65 aña di existencia di e club. Mandatario di Deporte ta gradici di curason tur boluntario pa sostene e club. Tambe, Minister Endy Croes ta gradici y felicita e atletanan cu ta e protagonista riba tereno. Palabra di danki sigur na e mayornan cu ta contribui y sostene nan yiu den nan deporte. Alabes palabra di danki na e fanaticada cu ta apoya futbol y nan ekipo. Pa conclui, Minister Endy Croes ta gradici tur persona cu den historia a dedica nan tempo valioso na S.V. Britannia. Den nomber di Gobierno di Aruba, Minister Endy Croes a haci entrega di un reconocemento na S.V. Britannia pa e gran labor y aporte na deporte di Aruba. Masha pabien!