ORANJESTAD: Diabierna ultimo, a tuma luga apertura di e exposicion “E balor di nos Piscadonan” di Sr. Mario Carrera den colaboracion cu UNOCA. Presente na e ceremonia di apertura tabata Minister Endy Croes, Vice Prome Minister Sr. Ursell Arends, Parlamentario Ricky Hoek, famia y demas invitadonan special. Sr. Carrera ta un pensionado cu a pasa den un accident na aña 2009 cu a cambia su bida. Doctornan a bisa Sr. Carrera cu nunca mas lo por cana, pero su fe den Dios a pone e lanta for di cama y lucha contra tur dificultad y dolor. Sr. Mario Carrera a enfoca su mes den algo positivo y a desaroya su talento den e mundo den e arte, esta pintamento. Den e exposicion “E balor di nos Piscadonan,” Sr. Carrera ta expone 31 obra di arte dedica na nos piscadonan di Aruba. E cuadranan ta masha bunita y ta inspira riba nos Aruba Dushi Tera. Sr. Mario Carrera kier logra cu e exposicion aki pa Pueblo di Aruba reflexiona riba e peliger y sacrificio di bida di un piscado. Nos piscadonan a traha hopi duro cu un amor inmenso nan a lanta nos economia. Sr. Carrera su deseo ta cu bendicion baha y cuida cada piscado riba lama. Cada cuadra ta refleha e bida di un piscado y ta conta su storia. E exposicion aki, Sr. Carerra a dedica na tres (3) baluarte piscado; Sr. Roly Bisslik, Sr. Johannes Henriquez y Sr. Dominico Bermudez. Minister Endy Croes tabatin e honor pa hiba palabra den nomber di Minister President Evelyn Wever – Croes y Minister di Cultura Xiomara Maduro. Pa conclui, Minister Endy Croes ta felicita Sr. Mario Carrera y henter famia cu e bunita exposicion. Alabes mandatario di Enseñansa y Deporte ta invita Pueblo di Aruba pa pasa mira e bunita exposicion “E balor di nos Piscadonan” di Mario Carrera na UNOCA for di dialuna pa diabierna entre 9’or di mainta pa 3’or di atardi. E exposicion lo t’ey te cu 2 di november 2023.