ORANJESTAD: Dialuna mainta, Minister di Enseñansa Endy Croes a bishita Colegio Arubano na Oranjestad. Na unda cu e mandatario di Enseñansa y Deporte a combersa y a invita e studiantenan di voorexamenklas y examenklas cu ta desea pa continua cu nan estudio na Hulanda pa un anochi informativo dedica na nan. E anochi informativo ta tuma luga diaranson awo, 25 di october 2023 na The Movies IMAX na Gloria. Esaki ta di dos (2) bes cu ta organisa e proyecto aki cu ta hiba e nomber: Inscribi pa Studentenkamer. Durante e anochi informativo lo brinda informacion amplio di alohamento (huisvesting) na Hulanda. Arubahuis y Departamento di Enseñansa lo ta presente pa brinda informacion y contesta pregunta relaciona cu estudio na Hulanda. Ademas, lo tin un presentacion di Sra. Paloma Osorio di Fundacion Plan di Bida pa educa e alumnonan tocante maneho di presupuesto y Realign Caching, Consultancy & Services di Sra. Liseanne Sambo – Gomez cu lo duna informacion di escogencia di estudio y con pa yena e formularionan.
E meta di e evento aki ta pa yuda y motiva e alumnonan inscribi pa camber na tempo, mirando cu si bo no tin un vivienda na Hulanda, no por haya un BSN nummer y consecuentemente no por habri un cuenta na banco y no por inscribi pa scol. Minister Endy Croes a enfatisa cu esaki ta un problema grandi pa e studiantenan cu ta continua cu nan estudio na Hulanda sin tin un vivienda. Minister Endy Croes kier evita pa e studiantenan pasa den e proceso aki y cu esaki perhudica nan estudio na Hulanda.
Rector di Colegio Arubano Sr. Tim Croes a gradici Minister Endy Croes pa bishita Colegio Arubano y pa trece informacion valioso pa e alumnonan di voorexamenklas y examenklas cu ta biahando na Hulanda e proximo aña. Sr. Tim Croes a indica cu tin hopi interes pa proyecto di diaranson venidero. Nos por corda cu na luna di maart, Minister Endy Croes a haci e anochi di informacion aki y e tabata hopi bon pa e alumnonan. Sr. Tim Croes ta hopi contento y ta gradici Minister Endy Croes pa ripiti e proyecto aki.
Pa conclui, Minister Endy Croes ta gradici Sr. Tim Croes, decaan, docente- y alumnonan pa e caluroso recepcion. ‘Nos ta warda e alumnonan mas un (1) mayor diaranson awo, 25 di october na un atardi di informacion dedica nan’, Minister Endy Croes a finalisa.
