Calabas/Kudawecha – Diasabra anochi ultimo den e unico Domino Square Garden na mundo, un drama total a tuma luga cu a laga hopi wowo di fanatico di domino keda blink so. Locual a cuminsa manera un bon bataya, a resulta di ta un wega manera pushi ta hunga cu raton anto ora pushi fada e ta haci ‘korte metten’ cu e pober raton. Ta trata aki di e bataya entre e famoso ekipo di pariba di brug, Pariba Legends DT, kende nan a baha bin pabou pa enfrenta e grupo nobis nobis cu e nomber copioso Pluma Gang. Wel, wel, ‘very soon’ a compronde exactamente pakico e nomber t’asina. E prome mita a cuminsa estilo ‘un toma y dame’, caminda tabata parti punto netchi netchi manera bon mucha den klas. Un pa mi, un pa bo, y asina e bataya tabata bay a paso di morocoy 7-7, 8-8, etc. Na final cu score 9-9, Pluma Gang a dicidi di ‘top up’ nan speed un tiki asina y crusa finish di prome mita cu score di 11-9.

‘Pero entonces’ … ‘hay entonces’ … despues di saboria e snacknan gratis y modela p’e ‘photo shoot’, algo a cambia den e gang nan plumanan! Cos a bolter y a bira style di ‘no more mister nice guy’! Pluma a cuminsa spart bay laira ora cu den un accion relampago estilo ‘Blitz Krieg’, e ekipo nobo di Pluma Gang a demostra nan poder door di den un frega di wowo aplasta Pariba Legends cu score impresionante di 21 – 11! Boedoem! Manera un testigo a declara ta cos di drenta baño dal un ‘leak’ sali bek haya sala bashi y wega a caba. Prome cu e anochi a hala cera drechi, un caravana tristo sin un pluma a move bay pariba. Segun mala lengua, e desaster aki a pasa pasobra den di dos tempo e padrino di Pariba Legends, e famoso ‘Snor’ Perez, no a hunga mas. Tempo lo bisa kico ta kico, pero por lo pronto ta parce cu Pluma Gang t’asina fuerte cu te hasta foi morocoy nan por ranca pluma.