ORANJESTAD: Despues di un exitoso Concurso di Pintamento pa scol basico cu a culmina diahuebs 19 di october 2023, Minister di Enseñansa Sr. Endy Croes, ta lansa e Concurso di Kleur pa tur scol preparatorio.

Na augustus cu a lansa e Concurso di Pintamento pa scol basico a anuncia cu na e luna di october sea Minister Endy Croes of Minister Ursell Arends lo lansa e Concurso di Kleur pa scol preparatorio. Algun siman atras, Minister Ursell Arends a laga e concurso den man di colega Minister Endy Croes cu awe ta lansa esaki.

Desde aña 2020, e muchanan di scol preparatorio ta wordo inclui den e concursonan cu Gabinete Wever-Croes ta lansa cu tin como meta pa sigui conscientisa comunidad, e biaha aki nos muchanan mas chikito specialmente, cu nan mascota merece hopi amor y bon cuido. Si cuminsa inculca e amor pa mascota den nos muchanan, esey ta garantisa un miho futuro pa locual ta trata un escogencia responsabel si ta tuma un mascota si of no y e cuido debido di un mascota door di su doño.

Na aña 2020 e tabata un Concurso di Pinta y Kleur pa e muchanan di scol preparatorio te cu aña 3 di scol basico. Na 2021 tabatin 2 concurso, un apart pa scol basico y un concurso di kleur pa scol preparatorio lansa conhuntamente cu Purina, caminda mas cu 100 “kleuters” a participa. Aña pasa Gobierno di Aruba a bolbe haci un concurso combina di pinta & kleur pa e muchanan di scol preparatorio te cu aña 6 di scol basico y e aña aki atrobe Gobierno di Aruba a haci 2 concurso apart, esun di scol basico ta tras di lomba y awo ta toca turno na tur scol preparatorio.

E pintura cu e muchanan mester kleur ta un diseño di Sr. Armando Goedgedrag, similar cu esun di aña 2021, pero simplifica, special pa “kleine kleuters” por participa cu smaak.
Riba e pintura bo por mira un veterinario femenino cu 2 cacho, 1 pushi y 1 pisca rond di dje. Hasta por mira cu un di e cachonan recientemente a wordo opera: e tin su “cone” bisti pa e no por mishi cu su herida. Esaki ta pa mustra cu e ta masha normal pa laga sterilisa bo mascota; algo sumamente importante pa realisa, cual ta un tremendo manera pa yuda controla e populacion di cacho. Den “background” por mira un “oud Arubaans huisje” y un tiki di Aruba su naturalesa.

Participacion ta gratis y ta habri pa tur mucha cu ta bay scol preparatorio. Lo tin premio pa “kleine kleuter” y pa “grote kleuter” a base di nan edad (4, 5 y 6 aña di edad). E esfuerso di cada mucha di 4, 5 y 6 aña cu ta bishita scol preparatorio ta conta. Si entrega mas cu un formulario pa cada participante, e comision lo saca 1 so afo pa participa. E muchanan por pinta mas cos si nan ta desea, por ehempel un cura, mas cadushi, mas nubia etc. Ta p’esey e espacio rond ta poco habri ainda.

“Mi kier encurasha tur scol preparatorio pa incorpora e kleurmento den oranan di kleur na scol mes y asina laga e muchanan participa na scol mes”, Minister Endy Croes a expresa.

Muchanan tin te dia 5 di december 2023 pa entrega nan formulario di participacion na un di e siguiente luganan: MFA Noord, MFA Paradera, MFA Santa Cruz, MFA Savaneta, Oficina di Gobierno Edison Briesen na San Nicolas of na Bestuurkantoor Oranjestad.

Dia 19 di december, net prome cu vakantie di Pasco, lo anuncia e ganadonan riba e pagina di Facebook di Gabinete Wever-Croes y tambe riba e pagina di Facebook Stima Mi Mascota. E dia aki lo manda un e-mail pa e scolnan pa nan por avisa e alumnonan y si esaki no a wordo anuncia ainda, lo anuncia e fecha di entregamento di premio tambe. Ban haci e concurso aki un exito!