ORANJESTAD: Dialuna atardi, a tuma luga wega clasificatorio CONCACAF W Gold Cup di Seleccion Nacional Femenino na Compleho Deportivo Guillermo Prospero Trinidad na Dakota. Tremendo hugada, unda cu Seleccion Femenino di Aruba a gana Seleccion Femenino di Boneiro cu e score di 5-0. Minister Endy Croes hunto cu Vice Prome Minister Ursell Arends, Presidente di Parlamento mr. Edgard Vrolijk, Parlamentario Hendrik Tevreden, Shailiny Tromp-Lee, Setty Christiaans-Yarzagaray, Raymond Kamperveen y demas invitadonan special tabata presente pa apoya e team di Aruba. Despues di diesdos (12) aña Seleccion di Aruba por a hunga na cas bek den wega clasificatorio di CONCACAF. Por a sinti e emocion di e fanaticonan riba tribuna cu despues di varios aña a haya e oportunidad di mira y apoya nos Seleccion Nacional Femenino den un wega clasificatorio na cas. Un bon wega cu bunita toke, caminda e team di Aruba a entrega nan alma y curpa riba veld. E team di Aruba tin varios tempo ta entrenando y preparando nan mes. Esaki ta un ehempel bibo di cu deseo, disciplina, determinacion y dedicacion ta logra. Minister Endy Croes ta felicita nos Seleccion Femenino pa e tremendo wega, alabes ta felicita Sr. Veron Albertsz y henter e staf cu a prepara nos damanan di un manera extraordinario. Aruba ta orguyoso di boso.