Partido MEP: Durante encuentro ‘BAN TOPA’ na Club Don Bosco na Noord
UN BUNITA POESIA A WORDO DEDICA NA LIDER DI MEP
Den palabranan inspirativo, señora Emira Rodriguez-Tromp a describi maneho di Evelyn Wever-Croes durante e pandemia
E encuentro di Partido MEP ‘BAN TOPA’, dia 9 di November na Club Don Bosco na Noord, a haya un acohida grandi pa no solamente ciudadanonan di districto Noord pero di otro districtonan di Aruba na unda nan a trece nan preocupacionnan, ideanan, sugerencianan y sin laga afo, nan criticanan constructivo.
Partido MEP a wordo ricibi na e districto Noord cu hopi entusiasmo y gratitud pa e esfuersonan incansabel di Gobierno di Aruba pa recuperacion di nos pais despues di un temporada hopi dificil causa pa e pandemia. Esaki sigur ta tambe e resultado di union di nos pueblo pa un meta comun. E retonan cu a bin cu e pandemia a exigi resiliencia, innovacion y un compromiso di nos tur pa crea un futuro mas briyante pa nos pueblo. Hunto, guia pa un vision di speransa y progreso, nos ta logra cambionan positivo.
Esnan presente na e encuentro ‘BAN TOPA’ a keda satisfecho cu tur informacion brinda como tambe cu e transparencia di Partido MEP pa duna informacionnan riba topiconan relevante.
Na e ocacion tambe, un fiel votador di MEP, señora Emira Rodriguez-Tromp, miho conoci como Juffrouw Miertje, a sospresa Lider di MEP y nos Prome Minister Evelyn Wever-Croes cu un poeisa hopi bunita y inspirativo cu e titulo: Nos Minister President, Evelyna Wever-Croes. Den su poesia, señora Miertje a discribi e cualidadnan di Lider di MEP; su amor y dedicacion pa su trabou y su pueblo; su caracter firme, sin miedo y cu curashi pa guia nos pueblo durante e pandemia; y su determinacion pa hiba nos pais dilanti y recupera di un pandemia asina devastador. Y na final di e poesia, ta gradici Minister President pa cuida Aruba durante e pandemia. Na final, esnan presente a duna Juffrouw Miertje un fuerte aplauso.
Lider di MEP a keda hopi impresiona y emociona cu e poesia asina bunita dedica na dje. Y ta gradici juffrouw Miertje pa e palabranan asina bunita expresa. Lider di MEP ta gradici henter pueblo di Aruba pa e confiansa duna na Partido MEP y na su persona durante un temporada asina dificil pa nos tur. Covid a duna nos un proposito renoba, nos ta sigui wak dilanti cu determinacion, sabiendo cu e esfuerso di nos tur lo dirigi na un futuro marca pa resiliencia, solidaridad y perseverancia pa un miho mañan.
Encuentronan di ‘BAN TOPA’ lo continua den tur districto y Partido MEP ta extende un invitacion na henter pueblo di Aruba pa asisti na e encuentronan interactivo aki cu ta un oportunidad pa conecta, siña, y hunto bin cu ideanan pa un miho futuro di nos pais.
Bo participacion na ‘BAN TOPA’ ta encurasha nos pa sigui cu nos mision pa un pais prospero y uni. Boso sosten ta nos forsa y determinacion.
