ORANJESTAD: Sra. Rubia Ruthsella Ras tabata un di e balaurtenan cu a honra siman pasa diabierna durante Premio Excelencia den Deporte 2022. Parlamentario Raymond Kamperveen a haci entrega di un reconocemento na Sra. Ras pa su gran trayectoria y pa aporta grandemente den e deporte di Aruba. Sra. Ras a cuminsa hunga softball cu e edad di 10 aña. Desde inicio Sra. Ras a hunga pa un solo team, pero bou di diferente nomber: Love Birds, Toshiba Caribbean Village, Nevada y Koolaid. Na Aña 1976 Sra. Ras a forma parti di Seleccion di Antias como shortstop na Mexico y na aña 1978 Sra. Ras a forma parti di e team di Hoofdklas na Diemen, Hulanda como shortstop y picher. Sra. Ras a biaha varios parti cu Seleccion di Antias y despues Seleccion di Aruba, entre otro, Venezuela, Mexico, Colombia, Merca y Hulanda, unda cu Sra. Ras a marca historia pa Pais Aruba. Te cu awo, Sra. Ras tin mas cu 600 wega picha y semper cu bon resultado. Na Mundial di 1989 na Merca, Sra. Ras a bolbe hisa e nomber di Aruba den halto cu un record inolvidabel pa Aruba, caminda Aruba ta gana 6-3 contra Indonesia y despues Aruba ta gana Argentina 3-2. Banda di esaki, Sra. Ras tabata yuda como scorer, umpire y coach y a dedica hopi tempo pa yuda otro muchanan pratica y desaroya den e deporte di softball.  Ademas di softball, Sra. Ras tabata practica e deporte di futbol y basketball. Finalmente, Minister Endy Croes ta felicita Sra. Rubia Ras pa su gran trayectoria y ta gradicie pa aporta di gran forma den e deporte di Aruba. Aruba ta orgoyoso di bo Rubia!