Recientemente, e departamento di Social Work & Development na Universidad di Aruba a organisa su prome “Sociale Carrousel” pa e studiante nan di prome, tres y cuatro aña. E obhetivo principal di e carrousel tabata pa brinda e estudiante nan oportunidad pa conoce e variacion di organisacion nan social na Aruba. A través di esaki, nan a adquirí conocemento tocante e sector social y a explora e diverso servicionan, productonan, proyecto nan di e organisacion nan social presente y e significado di e rol di un trahado social den e organisacion.

E evento a consisti di un mainta informativo y educativo, ofreciendo un oportunidad unico pa e estudiante nan dialoga, intercambia idea nan y conoce mas cu 25 organisacion social estableci na Aruba. E estudiante nan a bishita e diferente ‘booths’ di e organisacion nan y a conduci entrevista nan pa compronde miho di nan vision, mision, servicionan, productonan, y proyectonan.

E Sociale Carrousel ta un parti integral di e curso “Orientation to Social Work Practice”, cual ta ser ofreci durante e prome aña di estudio. E vak ta enfoca no solamente riba teoria, pero tambe ta introduci e estudiante nan na e aspecto nan practico di e sector social, dunando e studiante nan un amplio bista y profundo desde nan prome aña.

Mirando bek na e mainta, nos ta reconoce cu e tawata exitoso, cu balor informativo y educativo. E evento a provee e estudiante nan oportunidad nan unico pa hiba conversacion nan significante cu representante nan di e sector social y pa establece conexions pa futuro pasantia.

E departamento y e estudiante nan di Social Work & Development kier a gradici cada organisacion cu a contribui na e exito di e evento. Boso dedicacion, amor, y pasion pa trabou social a resalta e mainta aki, y nos ta contento di por a ofrece e experiencia aki na tur cu a participa.

E departamento di Social Work & Development ta mantene un conviccion fuerte cu, hunto, nos por sigui empodera bida y transforma comunidad.