Coopera cu e Encuesta di Entrada y Gasto y participa pa gana!

Diaranzon ultimo 15 di November 2023, Oficina Central di Estadistica (CBS) a cuminsa cu e Encuesta di Entrada y Gastonan. E encuesta aki ta sumamente importante ya cu e informacion colecta lo wordo usa pa, entre otro, determina e macuto di compras a base di cual CBS ta monitorea e prijsnanna Aruba pa asina por determina e inflacion.

E encuesta aki tambe ta duna un bista amplio di e entrada y gastonan di hogarnan na Aruba y pa es motibo di e situacioneconomico y financiero di nos hogarnan. Di e forma aki por duna contesta na preguntanan relata na e situacion actual di hogarnan na Aruba como tambe por haci un calculacion nobo di nivel di subsistencia (bestaansminimum) na Aruba.

Manera nos a menciona e encuesta di Entrada y Gastonan ta encera 2 parti:

1. Hogarnan participante lo wordo puntra pa contesta algunpreguntanan tocante gastonan cu e hogar a haci durante e 12 lunanan cu a pasa prome cu e encuesta aki. E cuestionario aki ta digital y lo wordo yena pa e encuestador(a) pa medio di un tablet.

2. Hogarnan participante lo wordo pidi pa yena un Buki di Gastonan Diario. Den e buki aki tur gasto di tur miembro di e hogar mester wordo yena pa un periodo di 2 siman. E encuestador(a) lo duna instruccion na e hogarnan con pa yena e buki y tambe lo asisti den e yenamenato di esaki.

Teniendo na cuenta e esfuerzo y e tempo cu un hogar tin cu dedica na e encuesta aki, CBS ta anuncia pa prome biaha cu hogarnan cu participa na e Encuesta di Entrada y Gasto 2023-2024 tin e posibilidad di gana un bon di supermercado na balordi Afl.100. Pa bin na remarke pa participa pa gana e premio aki, hogarnan mester a contesta tur e preguntanan relaciona na e encuesta y tambe a yena tur nan gastonan den e Buki di Gastonan Diario pa e duracion di 2 siman.

Despues di cada periodo di 2 siman, CBS lo rifa, bou di e hogarnan cu a participa completamente na e encuesta, 10 bon di supermercado na balor di Afl.100 cada un. Hogarnan cu participa completamente na e encuesta por participa door di duna un number di telefoon di un miembro di e hogar. E number aki mester yena esaki na final di e cuestionario digital y lo wordo usa pa saca e hogarnan ganado. Di e manera aki CBS kier incentiva hogarnan pa coopera cu e Entrada y Gastonan 2023-2024.

Oficina Central di Estadistica ta pidi cooperacion di tur hogar cu wordo aserca pa un di nos encuestador(a)nan, pa por fabor coopera cu e encuesta aki. E exito di e encuesta di Entrada y Gastonan 2023-2024 ta depende di e cooperacion di un y tur.

Pa cualkier pregunta di e Encuesta di Entrada y Gastonan 2023-2024, por tuma contacto cu Oficina Central di Estadistica, durante oranan di oficina na 524-7433, y puntra pa cualkiermiembro di e team di e encuesta. Tambe por manda un e-mail nacbs@setarnet.aw