—-Cuerpo Policial Ta Informa——

ARUBA TA CONOCE E DI 9 MORTO DEN TRAFICO

Diabierna anochi pa 07:11 central di polis ta wordo notifica di un accidente grave na altura di Citgo Savaneta.
Un auto mester a alcansa dos peaton.

Na yegada di patruya na e sitio di e sucedido, ta pidi pa ambulance cu maximo urgencia mirando e situacion di un di e victimanan.

Ambulance a presenta na e sitio y trata e prome victima cu ta un turista hende homber cu ta mustra basta grave. Ambulance a stabilice y a transporte cu maximo urgencia pa hospital.

E otro victima cu ta un señora turista tambe a ricibi basta sla y tambe a wordo transporta pa hospital un rato despues.

Specialista di trafico a yega na e sitio como tambe polis technico pa cumisa cu e investigacion.

E auto cu a alcansa e dos peaton a core bay for di e sitio“ Hit & Run”. Despues di un investigacion relampago Polis di trafico a bin topa cu e auto na un cas na Tamarijn.

E chauffeur a wordo deteni y auto a wordo confisca pa mas investigacion.

Lamentabelmente awe madruga central di polis ta wordo informa cu pa 01:00 dr Nommerman ta anuncia cu e homber turista a fayese.

Ta trata di e turista hende homber Ali BINER naci na Merca di 75 aña.

Cuerpo policial ta manda palabra di condolencia na famia di e fayecido.

Ta haci un apelacion na tur automobilista pa den e dianan aki sea mas conciente y pone atencion den trafico y baha velocidad.