Diamars 5 di December anochi, CEDE di MEP na Santa Cruz a wordo conberti den un sala di exposicion hopi bunita. Lider di MEP, Evelyn Wever-Croes un biaha mas a celebra su cumpleaños rondona di e calides y admiracion di un publico grandi cu ta aprecia su trabou como Prome Minister di nos pais.

 

Transformando e ocacion den un evento diferente, Lider di MEP a organisa un ‘Mini’ Expo titula ‘Relaha y Recarga’, di su pinturanan cu el a bin ta trahando riba nan den e ultimo aña aki cu hopi creatividad y dedicacion, alehando asina su mente di e trabounan duro.

 

Loke a haci e celebracion aki berdaderamento uno special y bunita, tawata e meta tras di dje. E ganashi di benta di tur pintura ta wordo destina pa un bunita causa, pa trece un poco di alegria na algun famia den e temporada di fiesta aki, un temporada di aña pa duna, gradici y haci impacto significante den bida di otro.

 

E sala di Cede di MEP a wordo transforma masha bunita, exponiendo cada cuadra di Lider di MEP cu hopi elegancia, door di señor Tito Bolivar cu tin un experticio amplio den organisa exposicionnan di arte. Señor Bolivar ta Director di ArtisA, y a produci hopi proyecto relaciona cu arte, entre otro Aruba Art Fair. Señor Bolivar a wordo asisti door di su mama señora Diana Croes.

 

Expresando su gratitud, Lider di MEP ta extende un danki di curason na tur esnan cu a yuda pa haci e Expo un gran exito y crea un cambio positivo pa recauda fondo pa asina e fin di aña aki, por alegra Pasco un poco pa algun famia den nos comunidad. Un danki na cada ciudadano cu a cumpra un obra di arte y asina contribui na un bunita causa. A traves di arte di Lider di MEP, generosidad a wordo mustra pa logra un meta cu no a keda na un meta di Evelyn Wever-Croes, pero a bira un meta comun.

 

“Danki na cada un cu a bishita e Expo ‘Relaha y Recarga’ y celebra asina mi fecha natal. Danki na tur cu a haya oportunidad pa cumpra un cuadra mas na nan gusto. Mi conseho na cada ciudadano di nos pais ta pa haci un hobby cu ta relaha bo y recarga bo cu energia pa sigui traha y logra metanan grandi”, Lider di MEP a expresa.