Aruba Lions Club conoci den pueblo cu pa mas cu 75 aña ta sirbiendo comunidad y ta purba juda caminda cu por pa cumpli cu nan metanan segun nan programa y causanan global prescribi pa Lions Club International.
Den un combersacion cu miembronan di Aruba Lions Club ta mustra cu awendia ta dificil pa por recauda fondo entre tur e organisacion y fundacionnan, y pa esaki ta buska formanan diferente manera actividadnan social caminda pueblo por diverti y alavez juda e club pa por tin fondo pa sigui juda comunidad.
Cada donacion di nos ciudadano ta bai 100% bek den comunidad y pesey awe un biaha mas Aruba Lions Club ta logra pa juda un persona cu pa algun tempo ta buscando un ayudo pa renoba of construi un dentadura nobo.
Pa medio di nan projecto di Smile Mobile, familiarnan di e persona special aki a logra jega den contacto cu Aruba Lions Club su specialistanan den e ramo aki y asina a hasi un peticion pa un ayudo special y pa un persona special.
Technodent Aruba NV ta esun cu a analiza e trabou y despues hasi tur preparacion pa hunto cu Aruba Lions Club cubri e gastonan di e patient special aki cu despues di hopi tempo por a ricibi su dentadura completamente nobo.
Tawata un momento di hopi alegria y emocion pa e famia y tambe e patient, na momento cu a hasi entrega di su dentadura, caminda cu e sonrisa por a briya un biaha mas y awor por come mihor y re-establece su calidad di bida.

Pa Aruba Lions Club y Technodent Aruba NV ta mira un biaha mas riba un bon colaboracion pa por atende y buska soluccion pa casonan special manera esaki pa duna un servicio mas.
Aruba Lions Club tin algun causanan global pa cumpli cune tur aña, y ta reparti su fondonan pa por juda den e diferente causanan aki.
Cu e meta pa sirbi comunidad Aruba Lions Club hunto cu Technodent ta orguyoso cu nan a cambia e mundo di un persona den un temporada cu e por celebra den famia y habri un aña nobo cu un bunita sonrisa y felicidad cu un cambio su den calidad di bida.