Diamars anochi a drenta informe di un accidente cu hendenan herida na Turibana, mesora a dirigi tanto polis como ambulans na e sitio. Na yegada di e patruya a bin compronde cu un damita menor di edad sin rijbewijs a sali cu un auto sin papelnan na ordo sin permiso di su mayornan pa bay busca algo bolbe y ela sali dilanti di un auto y a bay frontal riba dje. Debi na e impacto tanto e dama chauffeur di e otro auto como e ocupante a resulta herida. Na yegada di e ambulans nan a atende e victimanan y mester a transporta e dama chauffeur pa hospital mientras e ocupante a ser atendi na e sitio mes. Pa locual ta e damita e mayornan a ser yama pa presenta y tanto e yiu como e mayornan a ricibi un tremendo zundra pa locual a sosode y a pone nan den un gasto basta halto.