ORANJESTAD: Recientemente, Minister di Enseñansa y Deporte Endy Croes a reuni cu e presidente Sr. Andre Angela di Arubaanse Atletiek Bond y e miembronan di directiva Sra. Safiera Schippers y Sra. Anecy Toussaint. Durante e reunion, a pidi informacion di e avancenan di e atletiekbaan di e proyecto di renobacion di Compleho Deportivo Guillermo Prospero Trinidad na Dakota. Minister Endy Croes a indica cu si e proyecto cana segun planificacion, e trabou di renobacion lo ta finalisa pa maart binidero. Pues, desde april en adelante Arubaanse Atletiek Bond por inicia cu nan planificacion pa training of eventonan deportivo riba e atletiekbaan nobo na Compleho Deportivo Guillermo Prospero Trinidad. Ademas, Sr. Angela a splica cu tin algun atleta cu mester bay cualifica nan tempo pa por participa den e campeonato di Caribbean Free Trade Association (CARIFTA). En bista cu actualmente Aruba no tin un pista di atletiek, e atletanan tin cu bay na Curaçao e luna aki pa cualifica nan tempo, den cual e mandatario di Deporte a duna aporte pa cumpra nan pasashi. Fuera di esaki, Sr. Angela a indica cu e dak di e lokaal na stadion cu ta uza pa timing system no ta den bon condicion. Minister Endy Croes a garantisa cu esaki tambe lo ta renoba momento cu finalisa e renobacion di e stadion. Tambe, nan a indica cu e timing system cu nan ta uza ta hopi bieu y Minister Endy Croes a pidi nan pa busca conseho na World Athletics pa evalua ki tipo di timing system por haya mas moderno y asina Ministerio di Deporte por duna un contribucion tambe pa esaki.