ORANJESTAD: En conexion cu Dia di Betico, Minister Endy Croes ta bishitando diferente scol rond di Aruba y dialuna ultimo a toca turno na Colegio Santa Teresita den curason di San Nicolas. Cabesante di e scol Sra. Janine Soliana – Vingal a ricibi e mandatario di Enseñansa y Deporte. Den un esfera ameno Minister Endy Croes a combersa cu e alumnonan di klas 5 y 6, unda cu a splica nan di e importancia di e celebracion di 25 di januari, historia, lucha y logronan di nos Libertador Gilberto François ‘Betico’ Croes. E alumnonan a scucha cu hopi atencion y a haci basta pregunta. Pa finalisa, Minister Endy Croes a expresa cu e tabata un mainta hopi exitoso. Alabes ta gradici cabesante di scol, docente- y alumnonan pa un mainta ameno. Minister Endy Croes ta desea henter Pueblo di Aruba un feliz Dia di Betico y ban hunto celebra e fecha aki en grande, esta dia 25 di januari proximo.