ORANJESTAD: Diahuebs anochi, tabata reina un ambiente total den Compleho Deportivo Frans Figaroa na Noord, unda cu a tuma luga e partido final di e di 19 edicion di Copa Betico Croes. Minister Endy Croes a presencia e suspenso di e wega final entre ekipo di Nacional y Dakota cu a bataya pa conkista e titulo maximo di e torneo. Un stadion yena cu fanatico pa duna sosten y apoyo na nan ekipo faborito. Sigur e tabata un tremendo partido, unda ambos ekipo a destaca. E partido a termina cu e score di 2-0 pa ekipo di Nacional cu goalnan anota pa Jastin Congo y Devis Oliveros. Esaki sigur tabata un momento historico pa prome biaha den 19 aña cu Nacional a titula campeon di Copa Betico Croes. Na final di e anochi Minister Endy Croes a haci entrega di e trofeo na e ekipo campeon di Copa Betico Croes 2024. Pa conclui, Minister Endy Croes ta felicita Nacional cu e titulo di campeon y Dakota cu e titulo di sub–campeon. Cu deseo, disciplina, dedicacion y determinacion boso a logra. Pabien na AVB cu a organisa un bunita torneo y na e deporte rey futbol.